SHILLONG: Primary skulrango skigiparang pilakan Teacher Eligibility Test (TET)-ko bilsignini gisepo pass ka·na nanga ine Supreme Court-ni rai on·aniko jegalenba Sombar salo, hajalni hajal skigiparang, New Delhi songjinmani Jantar Mantar-o jingjengataniko dakangaha aro ia jingjengatanio Meghalaya a·dokni primary skulrango skigiparangba re·ange bak ra·etokaha.
Ia jingjengataniko, All India Primary Teachers Federation (AIPTF) ong·ataha aro ia jingjengatanio a·song gimikonin sak 50,000-na baten primary skulrango skigiparang bak ra·angtokaha.
Batanggimin somoirango TET-ko pass ka·na nanggijan skigiparang, ru·utbea bilsirangna kam ka·sotokengahani gimin Supreme Court-ni rai on·aniko skigiparang raken jegalangtokaha.
Ia jingjengatanio, All Meghalaya Primary School Teachers Association (AMPSTA) aro APSTA-ni membor-rang bak ra·eaha aro uamangko AMPTSA-ni general secretary FC Shullai aro president Dipak Marak dilangaha.
Ia jingjengatanio dilgiparang aganprakengon, skigiparangko bilsignini gisepon TET pass ka·na nanga ine Supreme Court-ni rai on·aniara, indita bilsirangna kam ka·soenggipa gitcham skigiparangnade namen ra·chakna man·gijani aro kragijani ong·enga ine paraktokaha.
Ainni gita cholrangchi AIPTF-ni kacharini raiko ra·bina tik ka·engani gimin namnikpaaniko parakatengon, iandake raiko on·aniara primary skulrango skigiparangni kamko bon·atna jotton ka·ani gitasa ong·enga ine AMPSTA aro APSTA-ni dilgiparang parakataha.
Ia rai on·aniko nipiltaichina aro skigiparangni namgnina nambata cholrangko on·china gitaba skigiparang, ma·mong sorkari aro Supreme Court-ko didiangaha.
