TURA: Budbar salo, Animal Husbandry & Veterinary department, West Garo Hills District Cooperative Milk Union Limited (TMUL) baksa nangrime, National Milk Day-ko Tura-ni Ganol-o donggipa New Dairy Complex-o maniangaha aro ia program-ko ong·atanio, dud pale cha·enggiparang, cooperative membor-rang, official-rang, chatro chatrirang aro jolo songdongenggipa manderangba bak ra·angtokaha.
Ia National Milk Day-ko manianio, AH & Veterinary Department, Garo Hills Region-ni Joint Director Dr Arpilla M Momin, mongsonggipa sokgipa ong·e bak ra·angaha aro ia program-ko a·bachengate on·angaha.
Ia program-ko ong·atanio Dr Momin, jinmana aganprakengon, ‘Milk Man of India’ ine mingako man·gipa Dr Varghese Kurien-ni on·gilanirangko gisik ra·atangenba, uamangni on·gilanichi India a·songko a·gilsako dud man·batsranggipa a·songrangoni damsa ong·atna man·aha ine parakangaha. Dud pale cha·enggiparangna sorkarini dingtang dingtang scheme-rangni gimin talatanirangko on·angengon, an·tangtangni man·dapgnina iandakgipa namgnirangko ra·china Dr Momin didiangaha. Dudrangko nambate man·na gita an·tangtangni jilla kaanirangko tika su·na nangani gimin aro name nirok sandina nangani giminba Dr Momin aganangaha.
Iana skang, TMUL-ni Assistant Director-cum-Managing Director Wilda Ch Marak, ia salko maniani bidingo jinmana talate on·angengon, Dr Kurien-ni kamrangni gimin agan-talate on·angjolaha.
Ia program-o dongpae jinmana aganprakanggipa gipin manderangara, TMUL-ni Chairman Charbilline Sangma, Tura-ni Dairy Officer Balrang A Sangma, Tura-ni Senior Dairy Officer Phindarihun K Dhar aro gipinrang ong·a.
