Napsrukaniko champengna niamrang chu·ongjani giminsa ILP-na tikkelenga: Law Minister

SHILLONG: Niam gri napsrukanirangko champengna gita a·doko dongsogimin niamrang kolgapjaengani giminsa a·dok sorkari, Inner Line Permit (ILP)-ko man·na tikkelenga ine a·dokni Law Minister Lahkmen Rymbui parakataha.
“A·doko dongsogimin niamrang chu·ongaigenchim ong·ode chinga ILP-na dabijawachim. Dongsogimin niamrango chu·onggijanirang donga ine nikahani giminsa chinga ILP-ko ra·gatchina dabienga,” ine Rymbui, kobor ra·timgiparangna aganaha.
A·gilsakni gipin biaprangoba apsan dakgipa ra·bianirangko chagrongna nangenga ine janapatengon, United States a·songba sagalrangchi dongdulgenchimoba, ua biapo niam gri songdongenggiparang bang·en donga ine Rymbui parakataha.
Gipin biaprangoni re·baenggipa manderang, Meghalaya a·dokko an·tangtangni ‘songtang’ dakna man·jana gita sorkari raken kamko ka·enga ineba ua aganaha.
“Iani giminsa an·chingo, niam gri songdong a·chaaniko champengna bang·en niamrang donga. An·chingo Autonomous District Council (ADC)-rang, Land Transfer Act, Meghalaya Residents Safety & Security Act (MRSSA), aro Labour Law-rangba donga indiba ia niamrangko name chu·sokatnasa nangenga aro an·chingo dingtang dingtang dolrang, a·dok sorkari baksa nangrime kamko ka·na nangenga,” ine Rymbui aganaha.
Niamrango chu·onggijanirangba dongna man·aia ine janapatskaengon, “An·chingni nitobegipa Meghalaya a·doko, gipin biaprangoni re·baenggipa manderang, songdongkamna man·jana gita an·ching ia pilak niamrangkon jakkalna nanga,” ine Law Minister aganaha.
ILP-ni bidingo ma·mong sorkari mamingkon parakjaengani giminsa a·dok sorkari, MRSSA-ko taridapna nangaha ineba ua aganaha.
“Rasong gribee iako (MRSSA) a·songni President-ona watatna nangaha aro iani giminde anga mamingkoba aganna man·jawa,” ine Rymbui aganaha.
A·doko dongsogimin niamrangko bilake jakkalna nangengani giminba Law Minister aganaha.
“Uni giminsa an·chingo dongsogimin pilak niam retirangkon an·ching jakkalna nanga ine anga aganenga. Gipin biaprangoni re·baenggipa manderang, Meghalaya a·doko songdongkamna man·na gita an·ching ia niamrangko name jakkalna nangenga,” ine Rymbui aganaha.