SHILLONG: United States (US) a·songni procharok Franklin Graham-na India sorkari, visa on·na jechakani a·sel November-ni 30 tarik dipet Nagaland a·doko ong·atenggipa program-ko den·galpilna nangahani gimin iani bidingo nipiltaienba, ia procharokna visa-ko on·china gita National People’s Party (NPP), ma·mong sorkariko didiataha.
Iani bidingo ma·mong sorkarina sedoatengon, Nagaland a·dokni skotong Kohima songjinmao donggipa Indira Gandhi Stadium-o ong·atenggipa program-na Nagaland a·dokni hajalni hajal manderang tarisamsotokahaoba da·o ia procharok visa-ko man·jae re·bana man·jaengahani gimin ia program-ko ong·atenggipa Kohima Baptist Pastors’ Fellowship (KBPF) suk ong·jaengaha ine NPP-ni national working president James K Sangma parakataha.
1972 bilsio Rev Billy Graham-ni Nagaland a·dokona re·baani gimin janapatengon aro ru·uta bilsirangonin Nagaland a·dok, Graham nokdang baksa nangrimgiparang ong·a ine janapatengon, ia program-ko ong·ataniara, salgro salaram jolo donggipa Kristianrangna mingsa gamchatbegipa program gita ong·enga ine Sangma parakataha.
Ia procharokna visa on·jahani gimin mondolini dilgiparang aro dingtang dingtang dolrang, an·tangtangni suk ong·gijaniko NPP-na u·iataha ine janapatskaengon, iandake visa-ko on·jani a·sel tom·tome ong·atgipa toromni program-rangko champengataniara, Kristianrang bang·gipa biaprango ma·sisretanirang ong·katani cholrang donga ine NPP-ni working president, mikrakataniko on·angaha.
Gipin a·songrangoni re·baenggipa manderangna iandake rakgipa niamrangko ra·gatengani gimin ma·mong sorkarini kamko mittelpilangengon, ia procharokna visa on·na jechakaniko ra·pilchina aro Kristianrangni ong·atenggipa program-ko chu·sokgipa ong·atna gita visa-ko on·china NPP, ma·mong sorkariko mol·molataha.
