Mendipathar College-ni skigipani kosako ja·ku de·jaenga ine department-ko matnanga

TURA: Mendipathar College-o qualify ong·gijagipa assistant lecturer-ko kamo ra·anina badi ka·ani ja·manba ia skigipani kosako Education department aro a·dok sorkari maming ja·kurangko de·jaenga ine ia skigipani kosako badi ka·doanggipa Nilbath Marak matnangatenba, iani bidingo kachario badi ka·skana gita ka·mikkenataniko on·angaha.
North Garo Hills a·jani Mendipathar College-o qualify ong·gijagipa skigipa saksako Economic-ni lecturer dake rakkienga ine Nilbath Ch Marak parakatenba, ia skigipako kamoniko ra·galchina, Directorate of Higher & Technical Education (DHTE) office-na sedoatahachim.
Marak-ni u·iatani gitade, ia skigipara, Kharkutta MLA Rupert Momin-ni jikgipa ong·a aro ua 2005 bilsio graduate ong·on, 32 percent-kosan man·aiahachim. Graduate ong·ani ja·man ua, Dibrugarh University-o MA-ko dakaha.
“Ia skigipa, kamko ka·na gita qualify ong·ja ine nikani ja·manba uko kamoniko ra·galchina kamo donkuenganiara ra·chakna man·gijani ong·a. Kakketko agangenchimode ua, primary skulrango skigipani kamko ka·namangmangba qualify ong·jachim,” ine Marak parakataha.
Ia chittini copy-ko ua a·dokni Chief Minister Conrad Sangma, Education Minister Lahkmen Rymbui aro Mendipathar-ni MLA ong·an baksana college-o governing body-ni president ong·enggipa Marthon Sangma-naba on·ataha.
Marak-ni parakatani gitade, ia skigipao nangchongmotgipa poraiani gadangrang dongjagenchimoba, 2013 bilsionin Mendipathar College-o lecturer dake rakkiaha aro ian manderangni gisepo sing·dona nanganiko ong·ataha.
NEHU-ni dongimin niam gitade, college-rango lecturer-ni kamna Scheduled Tribe (ST) candidate-rangna 50% aro gipinrangnade 55%-ko nangtelachim indiba ia skigipade 32%-kosan man·e pass ka·aiaha ineba Marak parakataha.
“Iandakgipa lecturer-rangko Tikrikilla College-on ra·gala ong·ode maini gimin ia skigipako Mendipathar College-o lecturer dake rakkiskakuenga? Ia skigipara Kharkutta MLA-ni jikgipa ong·aiani gimin ian mikkang niteani ong·jaengama?” ine Marak sing·doataha.
Ia lecturer-ni kosako Education department-ni gita maming ja·kurangko de·jagenchimode ua Meghalaya High Court-o badi ka·doangskagen ineba Marak mikrakataniko on·angaha.