GHADC election-o NCP-ba Tribal ong·gijagipa candidate-rangna tikit on·jawa

TURA: Re·baenggipa 2026 bilsio ong·atna sienggipa Garo Hills Autonomous District Council (GHADC) election-o Bharatiya Janata Party (BJP), Tribal ong·gijagipa candidate-rangna tikitko on·jana tik ka·angani ja·man da·o Nationalist Congress Party (NCP)-ba apsan daken Tribal ong·gijagipa candidate-rangko susaatjana tik ka·angaha.
NCP Meghalaya State unit-oni u·iatani gitade, GHADC-ara A·chikrangni daka rikaniko, jatni niamrangko aro A·king gorerangko chel·chakgipasa ong·a ine NCP-ba bebera·ani gimin re·baenggipa bilsio ong·atna sienggipa GHADC election-o Tribal ong·gijagipa candidate-rangko susaatjana tik ka·angaha.
GHADC election-na NCP-ni gnigipa list-o seokgimin candidate-rangko Krismasna skangan parakatgen aro gittamgipa list-ko ja·mano parakatenba, bon·kamgipa candidate-rangko, re·baenggipa 2026 bilsini January 15 tarikna skangan parakatgen ineba NCP Meghalaya state unit-ni general secretary u·iataha.
NCP-ni tikitna dorgasto galani tarikko December 15 tarikona ra·doataha ine u·iatengon, ia bon·kamgipa tarikko nomination file ka·aona kingking ra·doatani cholrangba donga ine NCP State unit-ni general secretary parakataha.
GHADC election-na Bharatiya Janata Party (BJP)-ni tikitko skatang on·jawa indiba Scheduled Tribe (ST) candidate-rangnasan on·aigen ine adita salrangna skangsan Meghalaya BJP-ni dilgiparangba parakatahachim ine nikna man·a.
BJP-ni tikitko ST candidate-rangnasan on·na gita party-ni dilgiparang tik ka·angaha ine janapatengon, ian Tribal dilgiparangko, songadam nokadamrango daito ra·china aro namroro silroroaniko ra·bana kam ka·china miksonge dakani ong·enga ine BJP-ni dilgiparang parakataha.