MENDIPATHAR: North Garo Hills, Mendipathar antidamo non-tribal ba rurirang niamgri songdongenganina badi ka·anirangko man·soani ja·mano District Council-ni MDC-rang aro departmental official-rang Mongolbar salo biapona re·ange nirokeaha. Biapona re·ange nianio Kharkutta-ni MDC Cherak Momin, MDC Rinaldo K Sangma, MDC Agassi R Marak aro MDC Pardinand D Shira unbaksa administrative aro departmental official-rangba dongpaaha.
A·damona re·ange nirok sandianio chong·mot obostako ma·sina gita man·aha aro nipilanirangko dakangaha. MDC aro official-rangna agreba NGO aro songsalni dilgiparang bakrimangaha.
Indake civil society-ni dilgiparang, uamangni name dake nigimin ba u·igiminko MDC-rang aro official-rangna talate on·aha. Chong·mot a·selrangko nie-nike ra·ani ja·mano ia mamlarangni bidingo niam gita kamrangko ka·gen ine Council memborrang parakangaha.
