BAGHMARA: Chokpot jolo bijoliko tik ong·e watjaengani gimin a·jolo songdonggipa manderang dingtang dingtang neng·nikanirangko chagrongna nangengani gimin, bijoliko tik ong·e watchina gita a·jolni nangrimgimin NGO-rang dabiangaha.
Chokpot jolo bijoli wata tik ong·jani gimin daito gnanggipa department-na changni chang badi ka·ahachim indiba da·alona kingking maming namdapani dongkuja, songdonggiparang apsan neng·nikaniko chagrongna nangengkua ine NGO-rang matnange aganaha.
“Chokpot jolni manderang, bijoli sigija tange dongako salsa mangba nikna man·ja, ian daito gnanggipa department-ni simsakgija a·sel ong·enga aro uamangni simsakgija dakani a·sel a·jolo songdonggipa manderang neng·nikaniko chagrongna nangskaenga. Bijoliko tik ong·e watjaengani a·sel, sorkari office, bank, skul, sanram nokdringo, bading-chiwale cha·anio, aro ugita gipin kamrangko ka·anio neng·nikaniko chagrongna nangenga, jeni a·selan nanga kamrangko somoi gita matchotna man·jaenga’’ ineba NGO-rang matnange aganaha.
Chokpot-o jolo songdonggipa pilakan Garo Hills-ni gipin biaprango gitan namgniko man·na kraa. Unigimin daito gnanggipa department a·jolna bijoliko tik ong·e watna nanga, mol·molani aro dabianiko knachakjaode rakbate ja·ku de·gen ineba jolni nangrimgimin NGO-rang mikrakataha.
