TURA: Pa Togan Nengminja Sangma-ni chang 153-gipa siani salko Sukrobar salo, Pa Togan Nengminja Sangma Memorial Association, East Garo Hills a·jani Chisobibra-o donggipa Togan Park-o gisik ra·e manidilangaha aro ia manianio, a·dokni Chief Minister Conrad K Sangma, a·dokni PHE Minister Marcuise N Marak, dingtang dingtang official-rang aro jolo songdongenggipa manderangba bak ra·angtokaha.
Ia salko gisik ra·e manianio, a·dokni Chief Minister, jinmana aganprakengon, Pa Togan Nengminja Sangma-ni janggi tanganiko, skul aro college-rango dakmesokna man·na gita uni golpoko nambate see rakkianggen ine parakataha. Pa Togan-ni janggi tangani bidingo kan·dikgipa dakmesokaniko tarimanahani giminba Chief Minister, an·tangni kusi ong·aniko parakangaha.
Sorkarini ia gital ja·ku de·na miksonganiko parakatengon, “Meghalaya a·doko jakgitelanina dakgrikdilgipa matgrikrangni bidingo dakmesokanirangko tarichina chinga skul aro college-rangko didigen. Pa Togan-ni janggi tangani bidingo chu·gimik golpoko tarigen aro chatro chatrirang, uni golpoko ma·sie ra·china gita tarigipa golpoko dingtang dingtang skul aro college-rangna sualatgen. Ian an·chingni chadamberangko, uamangni pagitchamrangni gimin u·i-ma·sie ra·na dakchakani ong·gen,” ine Sangma aganaha.
Pa Togan-ni chang 153-gipa siani salko manianiara, uni A·chik jatna aro a·song gimikna ka·dongbee warachakaniko aro on·kanganiko gisik ra·atpiltaiani ong·a ineba Chief Minister parakataha.
“Pa Togan saksa an·tangni a·songna aro manderangna ka·saani giminsa British sorkarini kosako ka·dongbee warachakaha. An·ching A·chik sakantian uni kamna rasong chana gita nanga,” ine Sangma aganaha.
Pa Togan Nengminja Sangma-ni siani salko mikkangchiba maniangkuna gita a·dok sorkari, Pa Togan Nengminja Sangma Memorial Association-na dakchakanirangko on·angkugen ineba Chief Minister, ku·rachakaniko on·angaha.
World Tourism Day Community-chi dilenggipa Tourism Fund aro Chief Minister’s Special Development Fund (CMSDF)-ni ning·o sorkari, Chisobibra-ko namdapatna gita gong lak 17-mangni gita tangka paisarangko chame on·aha aro ia biapko namdapatangkuna gita bakan gong lak 20 tangkarangko chamdapatgen ineba ia tom·anio Chief Minister parakataha.
