TURA: Ru·uta bilsirangna Tura songjinmani damchet gittimrango donggipa sorkarini a·ao songdongenggipa te 754 nokdangrangna Sukrobar salo, a·dok sorkari, ia a·arangko para dake on·skana songgigrikgipa lekkarangko sualataha.
Ia lekkarangko a·dokni Chief Minister Conrad K Sangma, Tura jillani damchet gittimrango songdongenggipa nokdangrangna sualataha aro ia lekkarangko sualatanio, a·dokni Cabinet Minister aro Williamnagar-ni MLA Marcuise N Marak-ba dongpae bak ra·angaha.
Ia a·ani lekkarangko sualatanio a·dokni Chief Minister, jinmana aganprakangengon, Tura-ni gitcham MP Purno A Sangma sagini somoirangonin ia sorkarini a·arango songdongenggipa manderang, an·tangtangni neng·nikanirangko namatchina uko didirongachim aro uni election-o susachengani somoirangoba ia manderang apsan daken uko didiahani gimin ia biaprango songdongenggipa manderangni neng·nikanirangko namatna ua an·tangan jako ra·e kam ka·aha aro da·alo ia dal·begipa kamko chu·sokatna man·aha ine an·tangni kusi ong·aniko parakataha.
Ia a·ani lekkarangko pakwate on·na gita tom·aniko ong·atanio, bigha 452 a·arangko, sorkarini a·ao songdongenggipa manderangna para dake on·skana gita a·ani lekkarangko sualataha aro ia damchet gittimrangara, Dakopgre Ronggi Songgital, ITI Upper Matchakolgre, Meghalaya Survey School gittim, Sepoy Colony DC office gittim, Deringgagre gittim, Chinap Aslang gittim aro Nikwatgre gittimrang ong·a.
Manderangna dangdike on·na gita Isol una cholko on·enga ong·ode, manderangni neng·nikanirangko namatna gitasa pangnan krengchina uni pagipa Purno Sangma sagi uko aganrongachim ine gisik ra·atpilengon, ia biaprango songdongenggipa manderangna sorkari, politics-ni gita ia a·a parani lekkarangko sualenga ong·ja indiba ia biaprango songdongenggipa manderangni indita bilsirangna maming ka·dongani gri ong·e aro neng·nikanirangko man·e janggi tanganiko nikesa sorkari, ia biaprango songdongenggipa manderangna sorkarini a·arangko para dake on·skana ia ja·kuko de·aha ine Chief Minister parakataha.
Ia para dake on·enggipa a·ani lekkarangko ra·chakenba, somoi gita gamna nanganirangko gamchina gitaba Chief Minister, ia damchet gittimrango songdongenggipa manderangko didiangaha.
West Garo Hills a·jani Tura jillao donggipa sorkari a·arangko 2023-2024 bilsionin songgigrikna a·bachengataha aro uandaken 2025 bilsini November 26 tariko Cabinet tom·aniko ong·atangenba, Tura jillani ning·o donggipa damchet gittimni bigha 452 a·arangko, te 754 nokdangrangna para dake on·skana tik ka·angaha.
