AMPATI: Re·anggipa December-ni 20 aro 21 tarikrango Meghalaya Koch Students Union (MKSU), brigipa Koch Youth Festival-ko salgnina, South West Garo Hills a·jani Kuligaon songo ong·atangaha aro ia festival-o chatro chatrirang, chadamberang, jatko dilgiparang, jatni daka rikanirangko dakmesokgiparang aro dingtang dingtang dilgiparangba bak ra·angtokaha.
Ia Koch Youth Festival-ni bon·kamgipa salo, Mahendraganj constituency-ni MLA Sanjay A Sangma, mongsonggipa sokgipa ong·e bak ra·angaha aro ia tom·anio, Betasing-ni MDC Sanjay Koch, MKSU-ni president Kandarpa Koch aro dingtang dingtang dilgiparangba bak ra·angtokaha.
Ia tom·anio MKSU-ni dilgiparang, Kuligaon songni irrigation-ko taridapchina, nosto ong·gimin PWD ramako tarie on·china Tura-o MKSU-ni office aro library-na a·a baksa tangka paisarangko on·china aro MKA Patijora Zonal Committee-ni office-cum-library-na tangka paisarangko dakchake on·china gita dingtangmancha memorandum-ko Mahendraganj MLA-na on·angjolaha.
Ia dabianirangko niatna gita ua jotton ka·gen ine MLA Sanjay A Sangma, ku·rachakaniko on·angaha.
Iana skang, December-ni 20 tariko, ia Koch Youth Festival-ko MKSU-ni president Kandarpa Koch-ni nisan songdoe on·anichi a·bachengataha aro uni ja·man, dingtang dingtang program-rangkoba ong·atangaha.
Gnigipa attam, chong·motan December-ni 21 tariko, dingtangmancha cultural night-cum-variety show-ko ong·ate, ia Koch Youth Festival-ko matchotataha.
