SHILLONG: Jowai-oni Malidor-ona dakanggipa National Highway (NH) ramani obosta namroroangjaengaha ine badi ka·anirangko man·ahani gimin Sonibar salo, Shillong-ni MP Ricky J Syngkon, ia ramako an·tangan re·ange niangaha.
Ia ramako niangani ja·man kobor ra·timgipa manderang baksa agangrikengon, ia ramani mitam bakrango gari gorarangni re·ruraanirangko nikna man·engoba, bang·bata bakrangan obosta namangjaengaha ine parakataha.
Ramani mitam bakrango namdapatanirangko nikna man·engoba, ramako re·ruraenggipa manderang, mongsongbate dingtang dingtang biaprangona re·rurana nangenggipa manderang, neng·nikanirangko chagrongna nangtokenga ineba ua aganaha.
Ramarangko tarianio maming dongnuani gri ong·na nanga aro kamrangko nirokjringna nangenga ineba Shillong MP aganaha.
Rama tarianiko nirokjringna nangenga ine janapatengon, ramarangko name rakkianio sorkarimangmangsan daito donggipa ong·ja ine Syngkon, jolo songdongenggipa manderangkoba daitorangko jako ra·china didiataha.
Ramarango rongtal an·talatanirangko dakna nangengani giminba Shillong MP janapangaha.
