Niam gri koela salani, napsrukanirang dongkuja ine a·kanga
MENDIPATHAR: West Khasi Hills a·jani koelarangko, a·songni dingtang dingtang biaprangona ra·angna gita niam gri Mendipathar Railway Station-ona salbaenga ine social media-rango matnange seanirangko nikani ja·man Sonibar salo, North Garo Hills Youth Federation (NGHYF)-ni membor-rang, an·tangtangan kakketko nie ra·na gita miksonganio, Mendipathar Railway Station-ona re·ange nieaha.
Koborko on·ani gitade, ia koelarangko West Khasi Hills a·jani Shallang joloniko Mendipathar Railway Station-ona salbaaha aro ia koelarangko re·baenggipa salrangni gisepon, a·songni dingtang dingtang biaprangona rel gario ra·angna sienga.
Mendipathar Railway Station-ona re·ange koela salanirangko niangani ja·man, kobor ra·timgiparangna talataniko on·angengon, ia koelarangko niamo pangchaken railway station-ona ra·baaha ine uamang nikna man·aha ine NGHYF-ni dilgiparang parakataha.
“Mendipathar railway station-ona koela salbaaniko chinga nieaha aro pilak nangchongmotgipa lekkarangko nion, koelarangko aro gipin bosturangko, niamo pangchaken railway station-ona ra·baenga ine chinga nikna man·aha. Ia railway station-o merongrangkoba ra·onengani gimin ian ia jolrango kam ka·e cha·enggipa manderangna namgni ong·enga maina bostani bosta merongrangko rel gario ra·bae, ja·mano a·dokni dingtang dingtang biaprangona truck garirango ra·angskaengani gimin merongrangko ra·one aro garirangko gatate, ia jolrango kam ka·e cha·enggipa manderang laprangko man·tokpaenga,” ine NGHYF-ni president Panpan Marak parakataha.
Mendipathar railway station-ko kuliani da·o bilsi 13 ong·na sipilengaha aro da·alonan ia railway station gita niam gri napsrukbaanirangko nikna man·kuja ineba NGHYF-ni president parakataha.
“Mendipathar railway station-ko kuliani da·o bilsi 13 ong·pilengaha indiba da·alonan ia jolrango niam gri napsrukbaaniko nikna man·kujaenga. Batesa ia railway station-ko kulianichi, songni nokni manderang bang·en namgnirangko man·tokenga. Depa-ona rel project-ko ra·bana tik ka·chengani somoio anga an·tangan GSU-Northern Zone-ni saksa membor ong·e, niam gri napsrukbagiparangna jegalgipa ong·achim indiba da·alo Mendipathar railway station-ko a·bachengatanichi, ia jolrango songdongenggipa manderangna bang·en namgnirangkosa chinga nikna man·enga,” ine Marak parakataha.
Indake ong·engon, Garo Hills-ni manderangna skanggipa cholrangko on·chenge, labour-rangko da·o Gital Bilsi maniani ja·man biming segatna gita a·bachengatgnok ine NGHYF-ni secretary Edbirth D Shira parakatskaaha.
“Kamrangko ka·anio nangdapgencimode haida chinga gipin a·dokrangonikoba labour-rangko nangnaba gnang indiba skanggipa cholkode chinga Garo Hills-ni manderangnan on·chengna miksongenga. Iani bidingo chinga labour union aro dingtang dingtang dolrang baksaba apsan kamrangko ka·rimna gita agangrikmanaha. Niam gri re·bae kam ka·giparang dongjana gita chinga ID-rangkoba on·na sienga,” ine Shira parakataha.
