SHILLONG: Batanggimin sal somoirango, Krismasko manienggipa manderangni kosako kragija dake champengna jotton ka·gipa dolni manderangko Shillong-ni MP Ricky AJ Syngkon-ba raken jegalataha aro a·songni pilak manderangnan naljokaniko on·china gita ma·mong sorkariko didiataha.
Assam a·dokni Nalbari-ko man·chape a·songni dingtang dingtang biaprango Krismas manienggipa manderangko golmal ka·ani bidingo janapatengon, Krismasko manianiara tom·tomani aro toromni gita manianisa ong·genchimoba, iandake manianiko golmal ka·aniara namen kragijani ong·aha ine Shillong MP parakataha.
Iandakgipa kamrangara, dingtang dingtang jatrangni gisepo kenjagokataniko aro manderangni tom·tome janggi tanganiko golmal ka·ani gita ong·a ineba Syngkon parakataha.
Shillong MP-ni parakatani gitade, dingtang dingtang torom, jat aro jolrangni gisepo mande ra·grikanian a·songni pangchakani ong·a aro iandake mande ra·grike janggi tanganiko golmal ka·na jotton ka·aniara, a·songni bilko bilgriatani gita ong·a.
India gita dake dingtang dingtang jatrangni songdong a·chagipa a·songode, badiaba jolrangode mitam jat aro toromrang komibataigen aro badiaba biaprangode bang·battelaigen ine janapatengon, iani giminsa pilak jat aro toromrangnan sorkari chel·chakaniko on·na nangchongmota ine Syngkon parakataha.
Mikkangchi iandake a·songko bak dakna jotton ka·giparangko aro ong·gija dakgipa manderangko champenganiara ma·mong sorkarini daitoan ong·a ineba Shillong MP parakataha.
Iandakgipa kamrangko jrip nie dongaigenchimode, mikkangchi namjabata obostaona sokangnaba gnang ine mikrakataniko on·angengon, a·songni tom·tomanina aro namroro silroroanina pilak jat aro toromni ku·cholsan ong·aniko nangchongmota ine Syngkon parakataha.
