SHILLONG: Adita salrangna skang, Assam aro Rajpur jolrango, Kristianrangni Krismasko maniengmiting somoio Bajrang Dal-ni golmal ka·na jotton ka·ani gimin Meghalaya Pradesh Mahila Congress (MPMC) aro toromko dilenggipa dingtang dingtang dolrangba raken jegalattokaha.
Kristianrangni Krismasko maniengmiting somoio champengna jotton ka·ahani gimin Shillong Archdiocese-ni Vicar General Fr Richard Majaw-ba an·tangni suk ong·gijaniko parakatengon, iandake Kristianrangni manianiko golmal ka·aniara manderangni bebera·aniko aro Isolko chonnikani gita ong·aha ine parakataha. Iandake Kristianrangni kosako dokkol ka·aniara, Kristianrangni bebera·aniko bilakbatatanisa ong·enga ine janapatengon, mikkangchi iandakgipa kamrangko bilakbate champengchina Fr Majaw, a·dok aro ma·mong sorkarirangko mol·molataha.
Assam a·doko Kristianrangko aro Kristianrangni olakkiram nokrangko chadrapna jotton ka·rongengani gimin Khasi Jaintia Christian Leaders Forum (KJCLF)-ni secretary Rev Edwin H Kharkongor-ba suk ong·gijaniko parakatengon, 2024 bilsini February jao maikai Kristianrangni olakkigipa bimangrangko nisie galaha aro dingtang dingtang biaprango Kristianrangni olakkianirangko champengna jotton ka·anirangkoba Rev Kharkongor, gisik ra·atpilaha.
Skulrangan chadamberangko namgipa manderang ong·atna gita tarigiparang ong·a ine janapatskaengon, Krismasni somoio bi·sarangni kusi ong·e manianiko champengna jotton ka·aniara bi·sarangni bebera·aniko nosto ka·ani gita ong·a ine Rev Kharkongor parakataha.
Krismas manianiko champenggipa manderangni kosako rakgipa ja·kurangko de·na Assam Chief Minister Himanta Biswa Sarma-ni ku·rachakaniko on·ahani gimin mittelpilaniko parakatengon, mikkangchi torom nokdringrangko aro manderangni bebera·e olakkianirangko nambate chel·chakchina KJCLF-ni secretary didiataha.
Krismasni somoio Kristianrangni olakkianiko champengna jotton ka·ahani gimin Meghalaya Pradesh Mahila Congress (MPMC)-ni president Joplyn Scott Shylla-ba raken jegalataha aro ian a·songni niam bidiko on·gimin bilrangko pe·ani gita ong·aha ine parakataha.
Chonchongipa toromrangni kosako dokkol ka·aniara a·songni niam bidikko pe·ani gita ong·enga ine janapatengon, Krismas manianiko champengna jotton ka·anio jak donggipa manderangni kosako ta·raken rakgipa ja·kurangko de·china aro mikkangchi dingtang dingtang torom aro jatrangni meli nangrime dongchina gita MPMC didiataha.
