SHILLONG: Ia 2025 bilside da·o salsa salgnini gisepon wate re·angna siengaha indiba a·doko matchotgija dongkuenggipa kamrangde bang·en dongkuenga.
A·doko matchotchipgija dongkuenggipa kamrangoni mingsade Inner Line Permit (ILP)-ko ra·gatchina dabianian ong·a aro ia dabianiko da·alonan a·dok aro ma·mong sorkarirang chu·sokate on·na man·chipkujaenga.
ILP-ko chu·sokatna gita a·dok sorkari, ma·mong sorkarina daitoko pakwatengon, 2019 bilsini December jao Meghalaya Legislative Assembly-o iana dingtangmancha resolution-ko pass ka·ahaoba da·o bilsidok batpilengahaoba ma·mong sorkari, ILP-ko on·ani bidingo mamingkon parakskakujaenga.
ILP-ni bidingo a·dokni dingtang dingtang dolrang, da·alona kingkingan a·dok aro ma·mong sorkario dabitokkuenga.
Apsan daken, Khasi aro Garo ku·sikrangko Eighth Schedule-o napatchina dabie Meghalaya Assembly, 2018 bilsion resolution-ko ra·manahaoba da·onan ma·mong sorkari, iani giminba mamingkon parakkujaenga.
Iana agreba, bilsisnina skang, Shillong songjinmani Harijan Colony-o songdongenggipa manderang baksa so·sojengjeng ong·ani ja·man Harijan Colony-ko dingtang biapona apjitna gitaba a·dok sorkari tik ka·manahachim indiba da·alona kingkingan ia kamko sorkari chu·sokatna man·chipkujaenga. Iani bidingo sorkarini songe on·gipa High Level Committee, ru·uta somoirangna skangan report-ko on·manahaoba Harijan Colony-o songdongenggipa manderangko apjitna a·dok sorkari, biaprangko man·skakujaengachim. Ia kamko Meghalaya High Court-ba jako ra·e, ta·raken kamko matchotatchina a·dok sorkariko ge·etangaha aro da·o gital koborko on·ani gitade, Harijan Colony-ko apjitna gita a·dok sorkari, Defence official-rang baksa agangrikkuenga.
2023 bilsini Assembly election-na skang Meghalaya sorkari, Assam a·dok baksa meligrikna man·jaenggipa damdok sima jolrango meligrikaniko ra·bana namen gisik nange mesokahachim aro ia biaprangko sualgrikanio, badiaba songrangde suk ong·gijaniko parakahaoba, ia damdok biaprangko sualgrike Assam aro Meghalaya sorkarirang, Memorandum of Understanding (MoU)-o soi ka·grikaha.
Ia damdok biaprangko sualgrikani ja·man da·o bangki dongkuenggipa damdok biaprangni giminba a·dok damgnini sorkarirang agangrikna a·bachengtaiahachim indiba re·baenggipa 2026 bilsion Assam Assembly election-ko ong·atengani gimin da·o ia agangrikaniko dontongna nangao ga·aktaiaha.
A·dokni Reservation Policy-ko gital dake nipiltaiani kamrangba da·onan matchotchipkujaenga ine an·ching nikna man·enga. Reservation Policy-ko nipiltaina gita a·dok sorkarini songe on·gipa Expert Committee, adita jarangna skangan report-ko sorkarina on·manaha indiba da·onan ia report-ni gimin sorkari, manderangna parakskakujaenga.
India a·songni pilak biaprangon rel garirangchi nangdimatako man·tokengahaoba Meghalaya a·dokni skotong Shillong songjinmaonade da·ona kingkingan rel ramarangko tarina miksonganirangba chu·sokna gita man·chipkujaenga. Khasi aro Jaintia Hills a·jarangona rel rama tarianiko dingtang dingtang dolrang jegaltokengani a·sel da·ona kingkingan rel ramarangko tariani bidingo a·dok sorkari, maming ja·kurangko de·chakatna man·kujaenga.
Rel garirangko ra·baani bidingo chanchirimna gita a·dok sorkari, pilak political party-rangni bakrimanichi dingtangmancha committee-koba songna tik ka·ahachim indiba opposition dolrangoni bang·batan ia committee-o bakrimna jechakani a·sel ia committee, be·en pil·na man·chipkujaenga.
