B’desh Police-ni a·kanganiko M’laya Police, BSF jegalskaa
SHILLONG: Bangladesh a·songo chadambe dolko dilgipa Osman Sharif Hadi-ko so·ote galanio jak donggipa manderang, Meghalaya a·doko dongnuchakenga ine Bangladesh a·songni Police-rang a·kangataha.
Dhaka Metropolitan Police-ni Additional Commissioner Nazrul Islam-ni parakatani gitade, Bangladesh a·songo Osman Sharif Hadi-ko so·ote galgipa dolni sakgni manderang, Meghalaya a·dokni Tura songjinmaona katbana man·aha aro da·o ia manderang, Tura-on dongnuchakenga.
“Osman Sharif Hadi-ko so·otgipa manderangoni Faisal Karim Masud aro Alamgir Sheikh, Bangladesh a·songo uamang baksa bakrimgipa manderangni dakchakanichi India a·songni Meghalaya a·dokona batangna man·aha aro uamang da·o Tura jillaona sokangaha,” ine Islam parakataha.
Uamang, Meghalaya police baksa agangrikna cholrangko man·aha aro matnanga man·gipa manderangna dakchake on·gipa mande sakgnikode rim·na man·aha ineba Islam a·kangataha.
“India a·songo ia manderangna dakchake on·gipa mande sakgniko Meghalaya Police, rim·na man·aha ine chinga dingtang dingtang cholrangoniko kobor man·soaha,” ine Nazrul Islam aganaha.
Indake ong·genchimoba, Bangladesh a·songoni sima jolrang gita ong·gija dakgipa manderangni napsrukbaani bidingo maming u·iatanirangko man·soa dongkuja ine a·dokni police official-rang, kobor ra·timgiparangna parakatskaaha.
Bangladesh police-rangni iandake a·kanganiko Border Security Force (BSF) official-rangba raken jegalataha.
BSF-oni koborko on·ani gitade, Bangladesh a·songoni India a·songona katnapbaenggipani bidingo Border Guard Bangladesh (BGB)-onin maming u·iatanirangko man·sojaha.
Iandake Bangladesh a·songoni napsrukbae Tura songjinmao dongnuchakenga inako Garo Hills-ni dingtang dingtang police official-rangba raken jegalataha.
Bangladesh a·songo Inqaib Moncho dolni dilgipa Osman Sharif Hadi-ko re·anggipa December-ni 12 tariko, Dhaka songjinmani Bijoynagar jolo, rickshaw-o songreengmiting somoio, ma·sina man·gijagipa manderang, sepangonin goe galangahachim.
Hadi-ko nambate sanna gita December-ni 15 tariko, sildoreng ambulance-o Singapore a·songona ra·angahachim indiba ua nampilna gita man·jae, December-ni 18 tariko janggi galaiahachim.
