ILP, Khasi/Garo ku·sikko 8th Schedule-o napatchina dabianiko bilakbatatchina MP didia

SHILLONG: Meghalaya a·doko Inner Line Permit (ILP) ra·gatchina dabianiko aro Khasi-Garo ku·sikrangko Indian Constitution-ni Eighth Schedule-o napatchina dabianiko bilakbatatna gita dilgiparangni gisepo ku·cholsan ong·china, Shillong-ni Lok Sabha MP Ricky AJ Syngkon didiangaha.
Shillong MP-ni aganani gitade, iandakgipa a·dokni nanganirangna dabianirango, Opposition dolrang pangnan dingtang ramakosa re·rongani a·selan iandakgipa dabianirango bilgriataniko man·rongenga.
Dingtang dingtang political party-ni miksonganirang dingtang ong·genchimoba, a·doko songdongenggipa manderangni namgnina, iandakgipa kamrangode pangnan ku·cholsan ong·na nanga ine Syngkon aganaha.
Ku·cholsan kamko ka·anichisan iandakgipa kamrangkode chu·sokatna man·aigen ine janapatengon, dingtang dingtang dolrang aro dilgiparangni maming man·gnigri iandakgipa kamrangna dabianirangara, a·dokna maming namgniko ra·bajaenga ine Shillong MP parakataha.
Iandake dingtang dingtang dolrangni nangrime kamko ka·anio sawa namgnirangko man·enga, ukode nina nangja ine janapatskaengon, iandakgipa kamrangko chu·sokatna krenganio pangnan a·dokni manderangna, mongsongbate cholgri ong·gipa manderangnasa chanchie kamko ka·na nanga ine Syngkon aganaha.
ILP aro Khasi-Garo ku·sikrangko Eighth Schedule-o napatchina dabienggipani bidingo ua an·tangba ma·mong sorkari baksa agangrikaha ine gisik ra·atpilaniko on·angengon, ia dabianirangko chu·sokgipa ong·atna gita a·dokni Chief Minister Conrad K Sangma aro gipin dilgiparangba ma·mong sorkariko didiaha ine Shillong MP aganaha.
Shillong MP-ni aganani gitade, a·dokna nangchongmotgipa kamrango maming ku·cholsan ong·anirangko nikna man·jaengon, iandakgipa nangchongmotgipa kamrangode, a·dokni dingtang dingtang dilgiparang aro dingtang dingtang party-rang, ma·mong sorkariko didianio ku·cholsan ong·na nangenga.
Political party-rangni gisepo dingtanggrikanirang donganina an·tangni suk ong·gijaniko parakatengon, iandakgipa kamrango gisik nangbebeani aro an·tangtangko on·kangani donggenchimode, dilgiparang an·tangtangni man·gnirangko chanchigija, a·dokna aro a·dokni manderangnasa chanchie kamko ka·na nanggen ine Syngkon aganaha.