HNLC bobil dolni ka·mikkenatani ja·man chel·chakaniko on·na sorkari ku·chaka

SHILLONG: Hynniewtrep National Liberation Council (HNLC) bobil dolni ka·mikkenataniko on·ahani gimin a·dokni Deputy Chief Minister Sniawbhalang Dhar-na bilaken chel·chakaniko on·na a·dok sorkari, ku·rachakaniko on·angaha.
A·dokni pilak manderangnan, janggina kenchakna nangani somoirango a·dok sorkari, naljokaniko on·na kamko ka·enga ine a·dokni Deputy Chief Minister aro Home (Police) Minister Prestone Tynsong parakataha.
“Talbate aganna nangani kattarang dongjaha indiba chinga bilaken chel·chakanirangko on·anggen. Chel·chakanirangko bilakbatatna gita Police department, pilak nanga ja·kurangko de·aha,” ine Tynsong aganaha.
Tangka dabianiko Dhar on·na jechakahani giminsa IED bomako gopretna nangaha ine HNLC bobil dolni matnanganirangna aganchakaniko on·angengon, iani bidingo sorkari, maming u·iatanirangko man·soa dongjaha aro Dhar an·tangba, tangka dabiani chittiko man·soani bidingo sorkarina u·iatjaha ine Tynsong parakataha.
Tynsong-ni aganani gitade, iana skangde Dhar, dabigipa tangkarangko on·aha ine HNLC bobil dol a·kangaha indiba da·ode ua tangka gamja ine bobil dol a·kangskaengachim.
“Iandake bobil dolni a·kanganirangna anga mamingkoba aganna man·jawa indiba iandakgipa kamrangara, tangka dabie ra·anian ong·a. A·doko tangka dabie ra·na gita sorkari on·na man·jawa,” ine Deputy Chief Minister aganaha.
Khasi aro Jaintia Hills a·jarango adita sak MLA-rang, tangka dabiani chittirangko man·soaha ine HNLC bobil dolni a·kangenggipani bidingo aganchakaniko on·angskaengon, HNLC bobil dolni iandake a·kanganiara baditana kingking kakket ong·a ua an·tangde aganna man·jawa ine Tynsong parakataha.
HNLC bobil dol baksa agangrikaniko a·bachengpiltaina sorkari, pangnan do·gako oe donaienga ineba Tynsong, gisik ra·atpiltaianiko on·angaha.
A·doko niam reti pe·aniko aro so·sojengjeng ong·atna jotton ka·anio jak donggipa je dol ba manderangni kosako rakgipa ja·kurangko de·anggen ineba ua mikrakataniko on·angskaaha.
Dhar Construction Company-ni a·tipo IED bomako gopretanina police-rang, HNLC bobil dolna kam ka·e on·enggipa mande sakgni, chong·motan Richard Suchen aro Pynshaitbor Syih-ko rim·ahachim.