B’desh a·songo so·sojengjeng ong·anichi salgro salaram jolna kenchakna nangani donga: BJP

SHILLONG: Bangladesh a·songo mitam Islamist dolrang, so·sojengjeng ong·atna jotton ka·anirangchi India a·songni salgro salaram jolrango kenchakna nanganirang ong·enga ine Meghalaya a·dokni Bharatiya Janata Party (BJP), mikrakataniko on·angaha.
BJP-na ku·wattimgipa Mariahom Kharkrang-ni aganani gitade, Bangladesh a·songni mitam dilgiparang, India a·songni salgro salaram jolrangko bak dakna agananirangara, ia jolrango songdongenggipa manderangna kenchakna nanganirang ong·engani gimin iandakgipa kamrangko name nirikkina nangenga.
Da·ororoni Bangladesh-de skango gita ong·jaha ine janapatengon, Bangladesh a·songni gitcham sorkarirangde India baksa meli-nangrime dongna jotton ka·rongachim aro Bangladesh a·songo ma·chakgipa salgro salaram bobil dolrangni a·tiprangkoba nisie galrongachim ine Kharkrang aganaha.
“Da·o dipet salgro salaram jolrango dinggrikani chinrangko nikna man·kujaengoba, iandake so·sojengjeng ong·atna jotton ka·aniko champenganiara namen rakbegipa kam ong·a. Uni gimin da·onin sima jolrango nirok sandianirangko namdapatna nangenga, kolgapgijanirangko kolgapatna nanga aro napsrukanirangko champengsona nanga,” ine BJP Meghalaya-ni dilgipa aganaha.
Chel·chakgipa sipai dolrangko donani bidingo janapatengon, Meghalaya a·dokni simarangode Jammu & Kashmir a·doko gita Army-rangko bang·e donja indiba Border Security Force (BSF) sipairangkosa donskaa ine a·dokni gitcham police officer Kharkrang aganaha.
Sima jolrango BSF dolrangko bilakbatatchina aro ia jolrango tom·tomaniko rakkina gita a·dok aro ma·mong sorkarirangko bakrime kam ka·china gitaba Kharkrang didiataha.
Meghalaya aro Bangladesh a·songni gisepo kilometre 443 simarang dongani gimin ia simarango mikrakbate nirok sandianirangko dakna nangenga ine adita salrangna skangsan, Shillong-ni MP Ricky AJ Syngkon-ba aganahachim.
Ia sima jolrang gita Bangladesh a·songoni niam gri napsrukbana man·enga ine janapatengon, ia jolrango sorkari, sipai dolrang aro jolo songdongenggipa manderangba mikrake dongna nangenga ine Syngkon aganahachim.
Indake ong·engon, Bangladesh a·songo so·sojengjeng ong·atna jotton ka·anirangko nikna man·rongengani gimin a·song damgnini sima jolrango sipai dolrangni chel·chakaniko baridapataha ine sorkari official-rang parakataha.
Bangladesh a·songoni bobil dake chakatgipa dolrang, India a·songni salgro salaram jolrangona napsrukbae so·sojengjeng ong·atani kamrangko ka·na man·jana gita Meghalaya Police, BSF aro ma·mongni sipai dolrangko ia jolrango bilakbate donataha ine kobor on·aha.