TURA: Budbar attamo, West Garo Hills a·jani Phulbari Police Station ning·o donggipa Gomaijhora songo, matchu mangsako palani ja·man, matchu nokgipako matchu cha·ugipa ine ma·sisretenba, manderang ia mandeko jinma rikaha aro iako manderang ong·gija dake chanchichipe, kenjagokanirang ong·katskaaha.
Ia a·selni bidingo ja·mano police-rang talataniko on·ataha aro ian maming ong·gija a·sel ba jatgnini gisepo ding·chaogrikani kam ong·jachim ine parakataha.
Police-rangni u·iatani gitade, jatsani manderang, Gomaijhora songko jinma chadrapeaha aro manderang kenjagokna nangtokenga ine Budbar attamni 7:20 bajimango koborko man·soahani gimin bakan Phulbari Police Station-ni dolsa police-rang, ia songona dariangaha.
Songona re·ange sing·sandion, Budbar attamni 5:30 bajimango Gudibala songni Saif Ali minggipa mande saksa, an·tangni matchuko Rajpur songni Bablu minggipa mandena palaha ine ma·sina man·aha. Matchuko bregipa Bablu, an·tangni matchuko noktangona moangengmitingo, Gomaijhora song samba jolo matchu jokeming mi a·palona katangaha aro Bablu, matchuko rikangon, mitam manderang uko matchu cha·ugipa ine chanchichipenba ja·mano uko jinma rikna a·bachengskaaha.
Ia mandeko jinma rikon Gomaijhora aro samba jolrango donggipa songni manderang, iako ong·gija dake chanchichipskaaha aro ia manderang, Gomaijhora songko chadrapenga ine chanchipenba songni manderang kenjagokna a·bachengaha.
Ia obosta ong·aniara manderangni chanchichipanisan ong·aia aro iano jatgni dinggrika ba chadrapa dongja ine police-rang talataniko on·ataha.
Ia a·sel ong·ani ja·man police-rang, ia jolrango tom·tomaniko ra·bapilna man·aha ineba u·iataha.
Ia jolrango dinggrikanirang aro so·sojengjeng ong·anirang dongjana gita nirok sandina police-rangko donataha.
Jatgnini manderangkon tom·tomaniko rakkichina gitaba District Administration didiataha.
Tol·e jangbingbangatgipa kattarangko bebera·jachina aro social media-rango iandake tol·e jangbingbanggipa kattarangko gipatjachina gitaba West Garo Hills a·jani Superintendent of Police (SP) Abraham T Sangma didiataha.
