SHILLONG: Chang gnigipa Shillong Flower Show 2026-ko salgnina Lok Bhavan Garden Shillong-o January 26 tarik Sombar aro Mongolbar salo ong·atgen.
Flower show-ko Lok Bhavan-o ong·atgen, jekon Shillong Agri Horticultural Society aro Directorate of Horticulture-ni dakchakaniko ong·atenga.
January 26 tarik Sombar sal pring 8:15 bajio Meghalaya-ni Governor CH Vijayashankar, program-ko a·bachengate on·gen.
Uandake salgnina ong·atenggipa exhibition-o dingtang dingtang rokomni ba jatni pul bibalrangko, ornamental plants aro horticultural exhibit-ko mesokanggen.
Iandakgipa programko ong·atani miksonganiara horticulture-ko namdapatna aro jolni pul ge·giparangko didina unbaksana floriculture -ni bidingo manderangna u·iatna gita ong·a.
“ Shillong Flower Show 2026-ko jinma manderangna January 26 tarik atam 3 bajioni 8 bajiona kuliatgen. January 27 tariko 1 bajioni 8 bajiona kuliatskagen. Pilak manderangkon Lok Bhavan-ona re·bae Lok Bhavan Garden-ko niechina aro nitobegipa pul bibalrangko niechina okama.
