All Garo Hills NGO-rangni tom·aniko Tura dakopgre SMELC Building-o ong·atanga.

TURA: All Garo Hills NGO-rangni dilgiparangni gita, West Garo Hills a·jani Tura, Dakopgre SMELC (Social Mobilisation Experimentation and Learning Centre)-o tom·aniko ong·atengba, battanggimin salrangni gisepo ka·saninggija dake so·otako man·gipa sagi Dilseng M. Sangma-na ta·rake kakket bichalko  on·china aro Garo Hills-osan ong·aigija dingtang dingtang a·dokrangon tribal jatrangni kosako kragijagipa kamrangko ka·enganina aro una agreba  niamgri rorirangni tribal-rangni a·arango songdong a·chaenganirangko nambata nirok simsakanirangko dakna nangengani bidingo apsan chanchirimanganiko dakangaha.
Indake ia tom·anio dingtang dingtang NGO dolrangni dilgiparang jedake, All India Garo Union (AIGU)-ni President, Garoland State Movement Committee (GSMC)-ni President; A·chik Dedicated Integrity Leaders (ADIL)-ni Chairman aro  Durama Imbama Norimbi Dikkimbi A·chik Ma·giparang (DINDAM)-ni President, ia tom·anio mongsonggipa ong·e chanchirimaniko dilangaha.
Uni gisepon, ACHIK dolni membor sianggipa sagiko battanggimin salo ka·saninggija dake so·ote galahani bidingo chanchirimanganiko dakangengon, ia obosta ong·aniko mikrontangchi nikgipa ACHIK dolni dilgipa saksa iani bidingo chongmot obostarangko jinmana talatangengon,  2026 bilsini January 8 tariko ACHIK dol-ni dilgiparang Wadagonggre jolo niamgri ba Nokma sanirangni maming pangchakani lekkarang gri, ro·ong bikotengani bidingo kobor-rangko  man·soenba quarry a·damona  re·angaha aro jolni Nokma sanirang  aro niamgri chalaienggipa quarry nokgipa sakgnirangko okamatenba iani bidingo sing·sandianirango dakaha, aro nokmarangni talatgimin gita, jolo chalaienggipa quarry-rangko uamang darangna on·na dongja aro uamang ru·uta bilsirangnan  uamangni beng·anirangko manigija niamgri ro·ongrangko bikote cha·enga ine parakaha. Quarry nokgiparangoniko sing·sandianirango dakanio, uamango maming pangchakani lekkarang dongja aro uan niamgri chalaianiko dakenga ine ma·sina gitaba man·naha. Uni gisepo ACHIK dolrangni dilgiparang, niamgri chalaienggipa quarry-rangko ta·rake dontongchina aro mikkangchi manigija niamni kosako re·angkuode rakbata ja·kuko den·a nangao ga·akgen  ine quarry nokgiparangko raken beng·ataha aro uamang mikkangchi daktaijawaha  ine ku·chake ra·aha. Uni salgipin 9 tarikoba apsandake  Rongsanggre jolrangoba dalgipa quarry-rangko niamgri chalaiengani bidingo kobor-rangko man·taie uamang apsandake nirokeaniko dakna re·angtaiahachim, indiba ua somoio uamang darang saksako grongbajaha, indake uamangko unoni  re·bapilengmitting somoio rama jolgimikkan rorirang riting dake dingtang dingtang silchi darerangko ra·e dongsoaha aro uamangni re·bapilenggipa ramao dal·dalgipa ro·ongrangko dansoaha aro uamangni chanchisogija somoio rang·gitik rorirang uamangni garirangko chadrapaha aro jako ra·bitenggipa silchi darerangchi uamangni janggiko nisigalna jotton ka·aha ine parakaha. Indake ia obosta ong·ao rasonggribee uamangni ka·rimska Dilseng Sangma sootako man·na nangaha ine an·tangni suk ong·gijaniko parakataha.
Indake ua saloba uamang maming namgija miksongani gnang quarry adamona re·angjaha indiba A·chik jatni a·doktang chigatangoniko niamgri rorirangni ra·seke  uarangoniko gam jinrangko bikote chaenganina  ja·kurangko de·e , uarangko dontongatchina miksongesa re·angachim ine parakatengon,  ia chadrapaniara, ACHIK dilgiparangkosan chadrapaia ong·ja indiba ian A·chik jat gimikon chonnike dakaniba ong·a ineba parakataha.
Uni gisepon nangrimgimn dingtang dingtang NGO-ni dilgiparang, mikkangchi iandakgipa obostarangko nambate mikkangchakna man·na gita,Joint NGO Action Committee-ko bikotna,public awareness program-rangko ong·atna tik ka·angengon, tribal-rangni naljokanina nambata nirokaniko on·china aro niamri songdongenggipa non-tribal rangko am·sandianirangko dakchina , sianggipa sagini dongrikenggipa nokdangni manderangna lakh 15 Ex Grati-ko Special CM Fund-ni gita on·china, dos dakgipa rorirangko tarake rimenba sastiko on·china, aro uniko sianggipa sagini nokdangna pangchake janggi tanganina 4^th grade-ni ning·o kamko on·china dabianganirangko dake a·dokni Skotong Minister, Director General of Police, Deputy Commissioner & Superintendent of Police-na memorandum-ko  on·na miksonge tom·anio ra·chake ra·angaha.