AMPATI: South West Garo Hills-ni District Administration, Tourism Department aro Arts & Culture Department baksa nangrimenba salgnina ‘Mi Kari’, winter festival-ko February 13 aro 14 tarikrango Ampati-ni Student’s Field-o ong·atangna sienga.
Ian jatni daka rikani bewalrangko ripinge rakkianina aro songsalo ku·cholsan ong·aniko mikkangchi mikchikkimao rakkiangkuna miksonge ong·atenggipa Mi Kari festival-o dingtang dingtang jatni bewalko kal·susaanirang, songsusaanirang, photography,painting, flower show, healthy baby show aro talent show contests aro una agreba, dingtang dingtang changa sapanirangko pilak bilsirangni manderangnaba susaanirangko ong·atanggen.
Indake attamni somoio,Meghalaya Grassroots Music Program (MGMP)-ni ningo local artist-rangni ring·anirang, chrok mesaanirangkoba ong·atangskagen ine talatangengon, a·dokni mingsinggipa ringgipa dolrang-ba iano bakko ra·angenba festival-ni attamko an·saobatangatgen.
Ia festival-ko ong·atenganio, mongsongbate a·dokni janggi tangani aro badingchiwalani gadangko namdapatna cholko ra·enganian ong·a. Uni gisepon, festival-o dingtang dingtang government departments aro agencies-rang, local farmers, artisans, self-help groups aro badingchiwalaniko dakenggiparangni jaktangni tarigimin dingtang dingtang bosturangkoba pala simanirangkoba dakanggen.
Jatni daka rikani bewalrangko ripinge rakkiangna, tourism-ko namdapatna aro songsalni manderangni gisepo ku·mong nangrimaniko bilakbatatna miksonge ong·atna sienggipa Mi Kari festival-o a·jatangni manderang baksana gipin a·dokni manderangkoba niksona ka·dongsoenga. Una agreba, South West Garo Hills a·jao jatni daka rikani bewalrangko ripinge rakkienganiko namdapatna miksonge ong·atenggipa festival-o sakantian bakko ra·epachina district administration okamenganiko on·ataha.
