TURA: Divisonal Forest Officer (DFO), Territorial Division-ni, West aro South Garo Hills a·jani dingtang dingtang jolrango niamgri chalaienggipa karkana aro quarry-rangko sandienba, Forest Department-ni gita Show Cause Notice-rangko on·manahachim.
Indake niamgri kam ka·anirangko am·sandianio, Gomaijhora, Nayagaon, Balujhora, Baitbari, Borobakra, Hatogaon, Borogobal aro Motapara jolrangoniko niamgri chalaienggipa adita dam itta so·ani karkana aro ro·ong quarry-rangko Hollaidonga Range-ni Official-rang nikeaha, indake niamgri chalaienggipa itam so·ram aro ro·ong quarry-rangko chipataha.
Official-rangni parakatani gitade, ita so·giparang aro quarry-rangrangko chalaigiparang Meghalaya Minor Minerals Concession Rules (MMMCR), 2016-ni Rule 5-ko pe·enba, Mining Leases ba Quarry Permits gri chalaitokenga ine ma·sina man·aha. Unomitingo, Mining Department-oni ra·chakgimin Mining Plans, SEIAA Meghalaya-ni valid Environmental Clearance (EC) aro una agreba, State Pollution Control Board-ni gita nangchongmotgipa Consent to Establish (CTE) aro Consent to Operate (CTO)-rangkoba sandion quarry nokgiparang official-rangna lekkarangko mesokna man·jahachim.
Deputy Commissioner-ni dilanganichi, West Garo Hills, Tura, District Level Task Force (DLTF), dingtang dingtang department-rang baksa nangrime kamrangko ka·anichi niamgri chalaienggipa ro·ong quarry aro karkanarangko chipatna man·aha aro mikkangchi Forest Department ina rakbata ja·kurangko de·angkugen ineba official-rang parakaha.
WGH-o niamgri chalaienggipa itta karkana, ro·ong quarry-rangko chipata
Date:
Share post:
