PHULBARI: Re·anggipa January-ni 9 tariko, Rajabala police station ning·o donggipa Goalgaon songo, mande saksako so·otani ja·man a·kawe jolrango jatgnini manderang, so·sojengjeng ong·na kenchakanirang dongengani gimin obostarangko namatpilna aro ia jolrango tom·tomaniko rakkiangna gita Batabari-ni MDC Ashahel D Shira, Phulbari, Rajabala aro Chibinang-ni GSU, Nokmarang, Mondolini dilgiparang, bazaar committee-ni dilgiparang, je·delgimin manderang aro dingtang dingtang dolrang baksa tom·aniko ong·atangaha.
A·kawe jolrango ding·chaogrikanirang ong·na kenchakna nangani dongkuengani gimin, dolgnini gisepo meli-nangrimgrikaniko ra·bana aro tom·tomaniko rakkiangna gita Batabari-ni MDC, ia tom·aniko ong·ataha.
Ia tom·anio, Dadenggre Civil Sub-Division-ni SDO (Civil) Richa Kulkarni, West Garo Hills a·jani Superintendent of Police (SP), CRPF, SIT, Phulbari Police Station aro dingtang dingtang official-rangba dongpae bak ra·angaha aro tom·anio bak ra·giparangna, tom·tomaniko rakkina nangengani gimin agan-talatanirangko on·angaha. Ia tom·anio official-rang, dakchakanirangko nangan somoirangona official-rangni contact nombor-rangkoba on·angaha.
“Uni gimin tol·e jangbingbanggipa kattarangko gipatjachina aro niamko jaktango ra·jachina anga jolo songdongenggipa mande sakantikon didienga. Songni aro jatni daka rikanirangko mande ra·na nanga indiba niam retirangko an·ching pilakan manina nanga. Manderangna nangchongmotgipa bosturangko sokatanio, chatro chatrirangni re·ruraanirango aro manderangni janggi tanganio maming neng·nikaniko ra·bana nangja. Iani bidingo District Administration aro police-rang, dingtangmancha chongipa coordination/core committee-ko songaha,” ine Batabari MDC AD Shira parakataha.
