TURA: Kilometre 54 ong·gipa Rongjeng-Mangsang-Adokgre ramako tariani da·onan 20 percent-mangni gitasa matchotengkua aro ia ramani bang·bata bakrangan namsrangjae, re·a doanirango neng·nikanirangko man·tokenga ine A·chik Holistic Awakening Movement (AHAM) Adokgre regional unit parakatenba, ia ramako matchote tarina man·na gita a·bachengo tik ka·gimin gitan chu·gimik gong kror 210-ko chame on·china a·dok sorkariko didiataha.
Iani bidingo a·dokni Chief Minister Conrad K Sangma-na sedoatengon, ia Rongjeng-Mangsang-Adokgre ramako tarina Non Lapsable Central Pool of Resources (NLPCR) aro North East Council (NEC)-ni ning·o a·bachengode gong kror 210-ko chamenba, ia ramako tarina 2017 bilsio pangchakaniko songaha ine AHAM Adokgre regional unit-ni president Marchborn R Marak parakataha.
“A·bachengode ia project-na gong kror 210 tangkarangko chamahachim indiba ja·mano korosko jolo songdongenggipa manderangni nanganirangko nichenggija aro maming agangrikchenggija kror 123-ona komiataha. Iani a·selan garirang Ildek Akong-onasan re·na man·engkua,” ine Marak parakataha.
Ildek Chibimako kabatna tik ka·gipa RCC dolongkoba den·galpilani a·sel songni nokni manderang, chi banani somoirangoba chibimako bate re·na nangenga aro ian songni manderangna namen kenchakna nangani ong·enga ineba Marak parakataha.
Marak-ni parakatani gitade, AHAM dolni gita RTI ka·e am·sandion, Ildek chibimako RCC dolong kabatna gong kror 12 tangkarangko chame, mitam kamrangkode a·bachengahachim indiba ja·mano tangka paisarang chu·ongjae, kamrangko matchotgija galchipaiaha ine ma·sina man·aha.
Indake ong·engon, ia Rongjeng-Mangsang-Adokgre ramako matchote tarina man·na gita a·bachengo tik ka·gimin gitan kror 210 tangkarangko chamatchina aro Ildek chibimako matchote RCC dolong kabatchina gita AHAM Adokgre regional unit, a·dokni Chief Minister Conrad K Sangma-ko didiataha.
Adokgre primary health centre (PHC)-ko community health centre (CHC)-ona ra·doatchina gitaba AHAM Adokgre regional unit, a·dokni Chief Minister-ko didiataha.
AHAM Adokgre regional unit-ni parakatani gitade, ia Adokgre PHC-ara, Adokgre Block-ni ning·o donggipa dingtang dingtang songni manderangna an·seng baljokaniko on·enggipa health centre ong·a indiba ia PHC-o chu·onga kam ka·giparang, sanna banani cholrang aro bosturang dongjani a·sel manderang, sanna bananirangko ra·anio neng·nikanirangko chagrongna nangtokenga.
“Uni gimin ia PHC-ko CHC-ni gadangona ra·doate, ia jolrango songdongenggipa manderangna nambata sanna banani cholrangko on·china chinga nang·ko mol·molenga,” ine Marak, Chief Minister-na sedoatgipa chittio janapataha.
Indake ong·engon, Kharkutta Block-ni Imsambal songo rike donenggipa Eklavya Model Residential School (EMRS)-ko da·onan chalaigija galchipe donenga ineba AHAM Adokgre regional unit parakataha aro ia skulko ta·raken chalaichina a·dokni Chief Minister-ko didiataha.
AHAM Adokgre unit-ni parakatani gitade, Imsambal songo EMRS-ko 2013-2014 bilsirangon rikahachim indiba da·alona kingkingan ia skulko chalaigija galchipe donengani a·selan ian ia jolrango poraienggipa chatro chatrirangna aro songni manderangna dal·bea gimaani gita ong·enga.
