TURA: Garo Hills Autonomous District Council (GHADC)-ni mitam gitcham MDC-rangna, uamangni man·na nangkuenggipa pension-ni tangkarangko on·ahaoba mitam gitcham MDC-rangnade tangka paisarangko on·kujaenga ine sakgittam gitcham MDC-rang matnangataha.
Iani bidingo kobor setimgiparangna seachi parakatengon, sak 35 gitcham MDC-rangnade, re·anggipa 2025 bilsini December jaon Pension-ni tangkarangko on·tokaha indiba mitamrangnade pension-ni tangkarangko on·kujaenga ine sakgittam gitcham MDC-rang, an·tangtangni bimingrangko parakgija u·iataha.
“Chingaba gipin MDC-rang gitan an·tangtangko on·kange Garo Hills-ni manderangna dangdike on·paaha aro jolni namroro silroroanina an·tangtangni man·a gita on·gilpaaha indiba chingoni mitam gitcham MDC-rangnade, chingni indita bilsirangna man·gniko on·chipkujaengani a·sel chinga neng·nikanirangko chagrongna nangtokenga. 2025 bilsini December jao gitcham MDC sak 35-nade pension-ni tangkarangko on·ataha indiba gipinrangnade da·onan pension-ni tangkarangko on·kujaenga,” ine gitcham MDC sakgittam parakataha.
Iani bidingo uamang changni chang sorkarina aro GHADC-ni dilgiparangna u·iatahaoba da·alonan maming aganchakanirangko on·kujaenga aro talatanirangkoba on·jaenga ineba gitcham MDC-rang parakataha.
“Uni gimin pilak gitcham MDC-rangnan, pension-ni tangkarangko ta·raken on·china chinga GHADC-ni dilgiparangko didienga aro chingna man·na nangkuenggipa pension-ni tangkarangko February jani gisepo on·jagenchimode chinga aino pangchake nanga gita ja·kurangko de·na draatako man·gen,” ine gitcham MDC sakgittam parakataha.
Pension-ni tangkarangko man·kuja ine gitcham MDC sakgittam matnanga
Date:
Share post:
