SHILLONG: ‘Epstein Files’-ni bidingo matnanganirangna a·songni Prime Minister Narendra Modi-chi dilenggipa NDA sorkarini aganchakaniko dabienba Sombar salo, Meghalaya Pradesh Mahila Congress (MPMC), Shillong songjinmao signature campaign-ko ong·ate, jingjengatna a·bachengataha.
Jeffrey Epstein sagi baksa nangchakegipa lekkarango Prime Minister-koba janapani donga ine Congress dolni dilgipa Rahul Gandhi-ni matnange sing·doatani ja·man, Meghalaya a·dokoba Congress dolni me·chik dol, iani bidingo aganchakaniko on·china dabie, jingjengatna a·bachengataha. NDA sorkarini kosako iandake matnanganirang donggenchimode talataniko on·na nanga ine Mahila Congress dabiangaha.
Ia matnanganiara, 2017 bilsio Prime Minister-ni Israel a·songona re·anganiko Epstein-ni see rakkianio janapani donga aro iako email-o wataha ine parakani ja·man a·bachengaha. Indake ong·genchimoba, iandake matnanganiko External Affairs Ministry jegalatskaenba, ian pangchakani gri matnanganisan ong·aia ine parakatskaahachim.
Iani bidingo sandirokchenggijade jegalna man·jawa ine janapatengon, ia lekkao NDA sorkarini adita sak dilgiparangkoba biming mingaha ine report-rango janapani dongani gimin uamang, iani bidingo ma·mong sorkarini talataniko dabienga ine MPMC-ni president Joplyn Scott Shylla parakataha.
Iani bidingo kakketko ma·sikujaskal dilgiparang, kamtangtangko watchengna nanga ineba Shylla dabiangaha.
Ia jingjengataniko a·bachengatanio Mahila Congress-ni membor-rang, Shillong songjinmani dingtang dingtang biaprangona re·ange, manderangni soirangko ra·angaha. Ia soirangko ja·mano Prime Minister-ni Office-ona watatgen ine Shylla parakataha.
‘Epstein Files’-ni bidingo Mahila Congress jingjengatna a·bachenga
Date:
Share post:
