WILLIAMNAGAR: Mongolbar salo, Williamnagar jillani Ampangdamgre gittimo gital rikgipa Urban Health & Wellness Centre-ko a·dokni Cabinet Minister aro Williamnagar MLA Marcuise N Marak-ni jakchi nokdonggae on·angaha aro ia health centre-ko nokdonggaanio, East Garo Hills a·jani Deputy Commissioner RP Marak, Superintendent of Police (SP) SA Rynjah, District Medical & Health Officer (DM&HO) Dr Cruzie Elmina N Sangma, gittimni dilgiparang aro gipin sorkari official-rangba dongpae bak ra·angaha.
Ia Urban Health & Wellness Centre-ko nokdonggae on·anganio a·dokni Cabinet Minister Marcuise N Marak, tom·anio bak ra·giparangna aganprakangengon, Williamnagar-ni Ampangdamgre gittimo songdongenggipa manderangna ia sanchakram nokko kulie on·ahani gimin a·dok aro ma·mong sorkarirangko mittelpilangenba, a·doko manderangna an·seng baljokaniko on·anio kamrangko nambatatna gita ia 2026-2027 bilsini State Budget-o gong kror 2472-ko a·dok sorkari chamataha ine parakataha.
Meghalaya a·doko songdongenggipa manderangoni 92 percent-de Megha Health Insurance Scheme (MHIS)-o bimingrangko segattokahani gimin bang·a nokdangrangan sanna bananirangko ra·anio da·o korosrang komikalengaha ineba Marak aganaha.
Iana skang, ia Urban Health & Wellness Centre-ko kuliani bidingo East Garo Hills a·jani DM&HO, agan-talataniko on·angengon, ia health centre-o doctor saksa aro gipin kam ka·giparang, sanna bananirangko on·gen aro ia centre-o ming 12 service-rangko man·gen ine parakataha.
Ia tom·anio, East Garo Hills a·jani Deputy Commissioner RP Marak-ba jinmana aganprakengon, manderangna an·seng baljokanirangko on·na rakbee kamko ka·engani gimin health official-rangko mittelpilangaha.
