AMPATI: South West Garo Hills a·jao sorkarini scheme-rangko nambate chu·sokatna aro manderangna dangdike on·aniko namdapatna gita Mongolbar salo, South West Garo Hills a·jani Deputy Commissioner Anendya Raajsshre-ni dilanichi, District Coordination Committee (DCC)-ni tom·aniko Ampati-o donggipa DRDA Conference Hall-o ong·atangaha.
Ia tom·aniko a·bachengatanio, South West Garo Hills a·jani Deputy Commissioner, dingtang dingtang department-ni official-rangna aganprakengon, dingtang dingtang sorkari scheme-rangko chu·sokatanio aro manderangna dangdike on·anio, kamrangko namdapatna nangengani gimin aganangaha.
Pilak department-rangkon, an·tangtangni jako ra·e ka·enggipa scheme-rangni bidingo Block Development Officer (BDO)-rangna u·iatchina gitaba ua didiangaha. MGNREGA, PMAY aro MSRLS gita dakgipa scheme-rangko chu·sokatanio, BDO-rang baksa nangrime kam ka·chinaba Deputy Commissioner didiangaha.
Ia tom·anio, DRDA-ni Project Director RZD Shira-ba official-rang baksa chanchirimangengon, South West Garo Hills a·jani pilak biaprangon sorkari scheme-rangko nambate chu·sokatna gita pilak department-rangkon nangrime kam ka·china didiangaha.
Ia tom·anio dingtang dingtang department-rang, 2024-25 bilsini gisepo chu·sokatgipa kamrangko Power Point Presentation-chi mesoke on·angaha. Una agreba ia tom·anio, dingtang dingtang department-ni neng·nikanirang, bank-o nangchakegipa kamrang aro dingtang dingtang kamrangni giminba chanchirimangaha.
CM Connect, District Selection Committee aro uandakgipa kamrangni bidingoba ia tom·anio apsan chanchirimangaha.
