SHILLONG: Shillong Parliamentary Constituency-ni by-election-o susana gita Voice of the People’s Party (VPP)-ni ku·wattimgipa Batskhem Myrboh-ko party-ni candidate dake parakataha.
Shillong-ni Lok Sabha MP Ricky AJ Syngkon, re·anggipa February-ni 19 tariko, tanggitik saaniko man·enba siangna nangahani gimin da·o Shillong-ni gital Lok Sabha MP-ko seokna by-election-ko ong·atna nangengachim.
Iani bidingo u·iataniko on·angengon, 1-Shillong Parliamentary Constituency-ni by-election-o susana gita Batskhem Myrboh-ko party-ni candidate-na minge, party-ni State Executive Committee-na watataha ine VPP-ni dilgipa Dr AW Rani parakataha.
“Shillong-ni Lok Sabha MP Dr Ricky AJ Syngkon-ni tanggitik sianganichi 1-Shillong Parliamentary Constituency-ni by-election-ko ong·atna nangengani gimin chinga Dr Batskhem Myrboh-ko party-ni candidate-na mingaha aro uni bimingko ra·chakna gita party-ni State Executive Committee-na on·ataha,” ine Dr Rani parakataha.
Shillong Lok Sabha by-election-ko VPP chepiltaigen ine adita salrangna skangsan VPP-ni president Ardent Basaiawmoit, an·tangni ka·dongchakenganiko parakatahachim.
“Da·o dipet chinga candidate-ko tik ka·kuja indiba bakan chinga candidate-ni bimingko parakatgen. Chinga iako rasong dakna aganenga ong·ja indiba chinga manderangni nangnikanirangko ma·siengani gimin Shillong Lok Sabha seat-ko chingan chepiltaina ka·dongenga,” ine VPP president aganahachim.
Shillong Lok Sabha by-election-o susaani bidingo da·o dipet gipin political party-rangde mamingkoba paraka dongskakujaenga.
