TURA: Garo Hills Autonomous District Council (GHADC) election-o susana Schedule Tribe certificate-ko nomination file ka·ani somaio nangchongmotgen ine GHADC-ni gital niam ra·gatna tik ka·aniko ta·raken sorkari chu·sokate on·china dabie Garo Student Union (GSU) Central Executive Committee re·anggimin March 6 tarikni pring 5 bajioni mijal 7 tarik Sonibar pring 5 bajiona Garo Hills gimiko Non-Cooperation Movement (NCM) ong·atangaha.
Ia Non-Cooperartion Movement (NCM)-ko ong·atanganio Garo Hills gimikon manderang ong·katgija aro garirang re·gija unbaksa dokan basarang kuligija jrichichang ong·tokaniko nikangna man·achim. Indake ong·genchimoba Garo Hills-ni skotong Tura songjinmao Megahalaya sorkarini bilsi chet gapaniko manianina ‘Vision 2023 Program’ ko ong·atanichi Tura songjinmani adita ramarango garirangni re·ruraanirangko nikangna man·angskaaha.
Unigimin iandake Non-Cooperation Movement (NCM)-ko ong·atani somaio dal·a program-rangko ong·atanina sorkariko aro uno bak ra·gipa manderangko social media-rango adita manderangni matnanganirangko dakangskaanirangkoba nikangna man·skaahachim.
