Indigenous Peoples’ Rights-ni bidingo Nokma Council-o chanchirimanga

TURA: Indigenous Peoples’ Rights ba a·dok-chigao atchikape songdongenggipa manderangna songsalo sasonni bidingo mandetangchi sason ka·an baksa jatni daka-rika, changa-sapa, aro gam-jinrangko ripingna gita Indian Constitution ni Sixth Schedule-o on·gimin bilko A·chik songsalo gipin jatrangni jakkalsretna am·e Garo Hills Autonomous District Council (GHADC) election ong·nasienggipao bak-rengsi ong·pana jotton ka·enganiko champengan baksa Tribal rangna Sixth Schedule-o on·gimin bilko nokma-sanirangna talbate u·iate gipin jatrangni A·chik jatni mipalko ra·sekna am·enganiko champengsona man·na gita Sonibar salo Nokma Council-o chanchirimangaha.
Programo Shri. MK Marak, (kamoni neng·takgipa MCS officer) mongsonggipa ong·e bakko ra·e jinmana aganprakangaon a·bri jolo songdonggipa dingtangtegipa jatrangni dakbewal-rikbewal, aro niam-reti, aro a·dok-chigako dingtangmancha ripinge songsalko mandetangoniko seokgimin nokmarangchi sason ka·angchina on·gimin bilrangni gimin  talatanga.
Shri. Dicem D. Shira, (Advocate Tura)-ba, Sixth Schedule-ni bidingo u·iataniko on·angaha jekai  Articles 244(2), aro 275(1) a·bri jolo songdonggipa gimik a·dokrangna bil on·gipa ong·ja indioba ian Assam, Tripura, Mizoram, aro Meghalaya a·dokrangosan dingtangmancha sasonni bidingo bil gnanggipa ong·skaa ine u·iate ia bilk o man·engon Tribal rangni dakbewal-rikbewalko chel·chakna man·gipa ong·e re·baenggipa sal somoirango gipin jatrangni jakchi onchepaniko champengna on·gimin bil ba ong·a ine u·iatanga. Unbaksana Indian Constitution ni Sixth Schedule-o on·gimin bil an jat tangchi jat tangko sason ka·na gitaba bilko man·gipa ong·a jean Salgro-Salaram a·dokrangoni (mongsongbate dam 4 a·dokrangko) mangrake rakkina dakchakgipa ong·a ine u·iatanga.
Ia tom·aniko Grassroots Organization Shillong/Tura ni dakchakachi ong·atangaha jeon Shri. MK. Marak, (retd. MCS Officer), Shri. Merril N. Sangma, (retd. MCS officer), Shri. Roger Benny A. Sangma (Member DISHA), Shri. Dicem D. Shira (Advocate Tura), sorkari official, Nokma aro gipinrang bakko ra·angaha.