MANGSANG: East Garo Hills ajao donggipa Mangsang jolo dingtang dingtang nangnikanirangko janape, A·chik Holistic Awakening Movement (AHAM), a·dokni Skotong Minister Conrad K. Sangma-na lekka sedoaha.
AHAM Mangsang Sub Unit-ni sedoatgipa chittio janapatgimin gita, Mangsang-o Auditorium dongjani a·sel, dingtang dingtang official kamrangni nanganirangna, jolni nanganirangna tom·aniko ong·atenganio neng·nikanirangko man·na nangenga ine parakatenba, Mangsang-o Auditorium rike on·china, Skotong Minister-ko mol·molataha.
Minggipin nangnikaniko janapatskaengon, Mangsang jolo sagipa dinggipa manderangko aro una agreba rang·gittik a·sel ong·gipa manderangko gipin hospitalrangchi sana bananirangko dakna re·a doanio namen neng·nikaniko man·na nangenga, unbaksana, hospital-o sigimin manggisiko nokona ra·bapilna garirang dongjae bang·a neng·nikaniko man·na nanga ine parakatengon, jolo songdongenggipa manderangna ambulance bolsako on·china gitaba janapataha.
Una agreba, LP skul, SSA aro Adhoc skulrango, sechakani aro poraiani kitaprangko somoigita man·sojaengani gimin aro bilsini bijangchio Syllabus-rangko dingtangatengani a·sel, skulo poraienggipa chatro chatrirang aro skigiparang bang·a neng·nikaniko man·enga ine janapatenba, iani bidingoba tarake nirokatpachina A·chik Holistic Awakening Movement (AHAM) Mangsang Sub unit-ni dilgiparang, a·dokni Skotong Minister-ko mol·molataha.
Mangsang-o chagrongenggipa neng·nikanirangko nirokatchina CM-ko mol·mola
Date:
Share post:
