DADENGGRE: Sonibar salo, International Women’s Day-ko Dadenggre Civil Sub-Division-o maniangaha aro ia salko manianio Dadenggre-ni Sub-Division Officer (Civil) Richa Kulkarni, mongsonggipa sokgipa ong·e bak ra·angaha.
Ia salko manianio, Dadenggre Civil Sub-Division-ni SDO (Civil) Richa Kulkarini, program-o bak ra·giparangna aganprakengon, me·chikrangni daito aro on·gilanirangko janapangenba, me·chikrangni chakchikrakani aro on·kanganiko darangan mittelpilna nanga ine aganaha.
Nokdangni kamrang baksana me·chikrangni dingtang dingtang dakna nanggni kamrangko janapangengon, me·chikrang janggi tanganio chu·sokgiparang ong·pana gita tikkelaha aro me·chikrang chu·sokgipa ong·on, songsalba namroro silrorobatna man·a ine Kulkarni aganaha.
Ia program-ko ong·atanio, Dadenggre Civil Sub-Division-ni Assistant Commissioner Solomon J Syiem-ba jinmana aganprakengon, songsalna dangdike on·ani gimin pilak me·chikrangnan mande ra·pilskaaniko on·ani gimin ia salara namen dingtangmanchagipa ong·a ine parakataha.
A·doko mingsing minggamako man·gipa me·chikrangni gimin janapatengon, 1937 bilsio Mavis Dunn Lyngdoh-ni bilsi 31 ong·kuengmiting somoio ua Assam Legislative Assembly-ni membor-na seokako man·aha aro 1939 bilsio ua, Mohammad Syed Saadula-chi dilanggipa sorkario, skanggipa me·chik Cabinet Minister ong·aha ine Syiem parakataha.
Malayalam jawilwat ‘Eko’-o kal·gipa A·chik me·chik Biana W Momin-ni gimin janapangskaengon, bilsi 70 ong·pilahaoba ua chu·sokaniko man·aha ine chu·sokaniko man·na gitade, bilsi, biap ba ku·sikrangchi maming champenganirangko man·ja ine Syiem aganaha.
Noksa salsusaani aro essay sesusaaniko ong·atanio chegipa chatro chatrirangnaba ia salko manianio boksisrangko suale on·angjolaha.
Dingtang dingtang kamrango an·tangtangko on·kange kam ka·enggipa me·chikrangnaba ia salko manianio, Dadenggre-ni Civil SDO aro gipin official-rangchi, mittelpilani certificate-rangko on·angaha.
