TURA: West Garo Hills a·jao, mongsongbate Chibinang jol aro Tura-o manderangni ding·chaoe so·sojengjeng ong·anirangko nikna man·engani gimin West Garo Hills a·jani District Magistrate, Bharat Nagarik Suraksha Sanhita (BNSS)-ni Section 163-ni ning·o, March-ni 11 tarik pring 12:00 bajioni March 13 tarik pringwalni 12:00 bajiona curfew-ko konta 48-na ra·dodapataha.
Re·anggipa Sombar walo, Chibinang jolo so·sojengjeng ong·anirangko nikna man·ahani gimin District Magistrate, March 10 tarik pringwalni 12:00 bajioni March 11 tarik pringwalni 12:00 bajiona curfew-ko konta 24-na ra·gatangahachim.
Indake ong·genchimoba, Mongolbar salo so·sojengjeng ong·anirangko nikna man·kuahani gimin curfew-ko March-ni 11 tarik pring 12:00 bajioni a·bachenge, konta 48-na ra·dodapataha.
Curfew-ni somoirango, skul-college-rang, bank-rang, dokkanrang, bazar-antirang aro office-rangko chipe donna nanggen indiba hospital-rang, pharmacy-rang aro nangchongmotana re·ruragipa aro kam ka·giparangkode champengani dongjawa ine District Magistrate u·iataha.
