GHADC election-ko ra·dona miksongani dongkuja
SHILLONG: Garo Hills Autonomous District Council (GHADC) election-na nomination file ka·ani skanggipa salo, Tribal ong·gijagipa candidate saksako dingtang dingtang dolrang aro manderang, jinma chadrapani ja·man, ia election-o chel·chakanirangko on·na gita sipai dolrangko watdapatna a·dok sorkari tik ka·angaha.
Ia a·sel ong·ani ja·man Sombar salo, District Council Affairs (DCA) Department, West Garo Hills a·jani Deputy Commissioner-ko man·chape, Garo Hills gimikni DC-rang baksa chanchirimangaha.
GHADC election-na nomination file ka·ani skanggipa salo, Phulbari-ni gitcham MLA SG Esmatur Mominin aro gipin Independent candidate baksana uamangna kam ka·enggipa manderang, Tura-ni DC office-ona re·baani ja·man, uamangko dingtang dingtang dolrang aro manderang jinma chadrapahachim ine nikna man·a.
Ia a·selni bidingo janapatengon, pilak jatrangkon tom·tomaniko rakkichina aro peace committee-rangni tom·anirangko ong·atna gita DC-rangna ge·etaniko on·ataha ine DCA department-ni Commissioner & Secretary CVD Diengdoh parakataha.
Diengdoh-ni parakatani gitade, GHADC election-ko tom·tome ong·atna man·na gita sipai dolrangko watdapatchina ia tom·anio Superintendent of Police (SP)-rang, sorkariko didiataha aro sorkari, sipai dolrangko watdapatna tik ka·angaha.
GHADC election-o susana nomination file ka·na re·anggipa candidate saksako chadrapani bidingo a·dok sorkari, Deputy Commissioner-oniko chu·gimik report-ko bi·ataha ineba Diengdoh aganaha.
GHADC election-ko ra·dona miksonganirang dongama ine sing·anina aganchakaniko on·angengon, da·o dipet election-ko ra·dona miksonganirang dongkuja indiba obostarangko nie sorkari, ja·kurangko de·anggen ine Diengdoh parakataha.
Re·baenggipa April 10 tariko ong·atenggipa GHADC election-o susaenggiparang, Scheduled Tribe (ST) certificate dongna nanggen ine adita salrangna skang Executive Committee-ni niamko ra·gatangani ja·man, jatgnini gisepo so·sojengjeng ong·anirangko nikna man·engahachim.
GHADC-ni ra·gatgipa niamni bidingo sing·anina aganchakaniko on·angengon, iako da·o Meghalaya High Court niengkua aro sorkari, High Court-ni ge·etanina sengkuenga ine sorkari official parakataha.
