So·sojengjeng ong·atgipa manderangoni adita sakko police-rang rim·a
TURA: Batanggimin salgittamna joljol, Garo Hills-ni dingtang dingtang biaprango so·sojengjeng ong·angani ja·man Bristibar salode, Garo Hills-o tom·tomaniko man·piltaiaha. Bristibar salo pilak biaprangonikon so·sojengjeng ong·anirangko knasona man·jaha.
Sombar salo, Phulbari-ni gitcham MLA Esmatur Mominin aro sakgipin Independent candidate ong·e re·bagipa Enamul Hoque-ni nomination file ka·na re·baako, GHADC election-o Tribal ong·gijagipa manderangni bak ra·paaniko jegalenggipa dingtang dingtang dolrang aro manderang jinma chadrapani ja·man, joljol salgittamna so·sojengjeng ong·anirangko nikangna man·ahachim.
Chadrapako man·gipa Mominin-ni Phulbari-ona re·angpilani ja·man, Chibinang-o manderang silchidarerangko ra·e ong·katna a·bachengaha aro ja·mano dolgni manderang dinggrikna nangahachim.
Chibinang-o donggipa GSU office aro adita dokkanrangko so·e galani ja·man gipin dolni manderangba, Chibinang-ona re·ange, Chibinang bibrao donggipa dokkanrangko so·chipeskaaha.
Sombar walo dolgni manderang walgimik dinggrikani ja·man police-rangni gopongpongani ja·mansa Mongolbar pringchibara manderang katpriprana a·bachengaha.
Chibinang-o ong·anggipa a·selni bidingo Garo Hills gimikchin koborko man·soenba ja·man Mongolbar salo, Tura-oba manderang ka·a ding·chaoe dokkanrangko aro dingtang dingtang nokrangko so·chipskaaha.
So·sojengjeng ong·ani batroroangahani gimin Mongolbar walo Army aro ma·mongni gipin sipai dolrangkoba Garo Hills-ona okamataha indiba Budbar saloba apsan daken, ka·a ding·chaoenggipa manderang, dingtang dingtang nok aro dokkanrangko so·chipangkuaha.
So·sojengjeng ong·atanio, chu dokkan damgniko pe·e, manderang churangko ra·e kattokaha. Iana agreba jingjengatenggipa manderang, garirangkoba so·chipe galaha.
Salgittamna indake so·sojengjeng ong·angani ja·man Bristibar salode tom·tomaniko man·piltaia a·bachengaha aro uandaken Bristibar salode, manderang an·tangtangni nanga bosturangko koros ka·na man·na gita attam 2:00 bajioni 4:00 bajiona curfew-ko neng·takataha.
“Batanggimin salgittamna so·sojengjeng ong·aniko nikna man·ahaoba Bristibar salode chinga darangonikon so·sojengjeng ong·aniko knasona man·jaha. So·sojengjeng ong·atanio jak donggipa manderangoni adita sakkode chinga rim·aha aro iani bidingo ning·tue sandirokengkua. Mikkangchiba Garo Hills-o tom·tomaniko man·pilgnok ine chinga ka·dongenga,” ine Bristibar attamo, West Garo Hills a·jani SP Abraham T Sangma parakataha.
