Garo Hills-o tom·tomaniko rakkichina didia
TURA: Scheduled Tribe (ST) certificate-o nangchakegipa kamrangko National People’s Party (NPP) namatgen aro manderangna dangdike on·angkugen ine Sukrobar salo, a·dokni Chief Minister Conrad K Sangma, ku·rachakaniko on·angenba, Garo Hills-o tom·tomaniko rakkiangna gita pilak jatrangkon tom·tome aro meli-nangrime janggi tangangkuchina didiangaha.
Sukrobar salo, Tura-ni NPP office-o party-ni dilgiparangna aro party-na chakpaenggipa manderangna aganprakangengon, PA Sangma-ni miksonganirang gitan NPP on·kange kam ka·angkugen aro manderangni namgnina dangdike on·angkugen ine Sangma aganaha.
“ST certificate-ni bidingo neng·nikanirangko NPP namatgena aro chinga manderangna an·tangtangko on·kange kam ka·angkugen,” ine Chief Minister aganaha.
Garo Hills Autonomous District Council (GHADC) election-o Tribal ong·gijagipa manderangni bak ra·paaniko jegalengmitingt somoio Phulbari-ni gitcham MLA aro sakgipin Independent candidate, nomination file ka·na Tura-ona re·baani somoio dingtang dingtang dolrang aro manderang jinma chadrapani ja·man, Chibinang jolo dolgni dinggrikani ong·aha aro ia a·sel ong·anio mande sakgni so·otako man·na nangahachim.
Ia a·sel ong·ani ja·man Tura-oba so·sojengjeng ong·anirang batroroange, ramarango dingtang dingtang dokkanrangko, nokrangko aro garirangko jegalenggipa manderang so·chipe galahachim.
Indake ong·engon, NPP-ni gisepo ku·cholsan ong·e, party-ko mangrakbatatchina gitaba Sangma, party-na kam ka·enggipa manderangko didiangaha.
“Darangba NPP-ni kamrangko aro ka·donganiko bilgriatna man·jawa. Hai an·ching ku·cholsan og·e party-ko mangrakbatatna gita kamrangko ka·angkuna,” ine NPP-ni national president aganaha.
Tom·tomaniko rakkichina gita manderangko didiangengon, dingtang dingtang jatrangni gisepo saksa sakgipinko kema ka·grikna aro ku·mong nangrimani dongna nangani gimin Sangma aganangaha.
“Kristianrang ong·e an·chingko ka·sagrikchina aro kema ka·china skiaha aro ia somoio an·ching pilakan ku·cholsan ong·e ku·mong nangrimaniko rakkina nanga,” ine ua aganaha.
Batanggimin salrango Tura-o so·sojengjeng ong·anganio tom·tomaniko rakkina rakbee kamrangko ka·ahani gimin ua dingtangmancha police aro district administration-koba mittelpilangaha.
Tom·tomaniko man·pilna gita ku·cholsan ong·e kamko ka·ahani gimin a·dokni Chief Minister, Tura-o songdongenggipa manderangkoba mittelpilangaha.
