GH-ni a·kawe jolo songdonggipa gipin jatrang B’desh-nisa ine BJP-ni agananiko jegala

TURA: West Garo Hills a·jani a·kawe jolrango songdongenggipa Non-Tribal ba Tribal ong·gijagipa manderang bang·batan Bangladesh-oni katnape songdong a·chagiparangsa ong·a ine adita salrangna skang, Bharatiya Janata Party (BJP)-ni agananiko a·kawe jolrango songdongenggipa manderang raken jegalataha.
Garo Hills-ni a·kawe jolrango songdongenggipa bang·bata Non-Tribal-rangan Bangladesh-oni katnapbagiparangsa ine matnanganiko jegalatengon, ian chanchininggija aro manderangko dilsretna jotton ka·ani gitasa ong·enga ine a·kawe jolrango songdongenggipa manderang parakataha.
GHADC election-o Tribal ong·gijagipa manderangni bak ra·aniko jegalanio, batanggimin sal somoirango, Garo Hills-ni dingtang dingtang biaprango so·sojengjeng ong·anirangko nikna man·angahachim.
Salgittammangna so·sojengjeng ong·angani ja·man da·o ka·sinsin Garo Hills-o tom·tomaniko man·piltaina a·bachengengaha indiba tom·tomaniko man·pilsrangkujaengani gimin West Garo Hills aro gipin a·jarangoba da·onan curfew-ko ra·gatskakuengachim.
BJP-ni matnanggipa kattarangko jegalatengon, “GHADC-ni a·kawe jolrango Bengali ku·sik agangipa bang·bata Muslim-rangan Bangladesh-ni manderangsa ine agangipa kattarangni bidingo talataniko on·china chinga BJP-ni dilgiparango dabienga. Iandake agangipa kattarangara chanchigija aro manderangko dilsretna ku·watanisan ong·aia,” ine a·kawe jolrango songdongenggipa Non-Tribal-rangoni mitamrang seachi parakataha.
A·kawe jolrango badia biapmanchao Bangladesh-ni manderang donga, uko mesoke on·china gitaba ia jolrango songdongenggipa manderang, BJP-o dabiangaha.
“A·kawe jolrango songdongenggipa manderangoni bang·batan Bangladesh-oni katnapgiparangsa ine uamang (BJP) a·kangenga ong·ode, jol gimikko matnange dongaigija, badia song aro biap, uarangkoba mesoke on·na nanga. Da·o election-ni somoirang sokbaengon, iandakgipa kattarangko skatang agananiara namen kragijani ong·a. Ian politics-ni gita man·gnina aganani gitasa  ong·enga,” ine a·kawe jolrango songdongenggipa manderang parakataha.
Tribal manderangni a·arang, buring bolgrimrang, daka rikanirang aro bilrangko chel·chakna on·gimin GHADC-ni miksonganiko uamang mande ra·a ine janapatengon, “Ia niamrangko chinga jegalgiparang ong·ja indiba a·songni jakgitelko man·chengaonin a·kawe jolrango songdongenggipa manderang ong·e, chinga an·tangtangko Bangladesh-oni ine aganakode ra·chakna man·chongmotja. Chingoni bang·a nokdangrangan chengoni songdongbagiparang ong·a aro chingaba ia songo songdongkamgiparangan ong·a,” ine West Garo Hills a·jani a·kawe jolrango songdongenggipa gipin jat manderang parakataha.