So·sojengjeng ong·anina rim·gipa manderangko watpilchina GSMC dabia

TURA: Adita salrangna skang, Garo Hills-o so·sojengjeng ong·anina rim·a man·gipa Garoland State Movement Committee (GSMC)-ni acting chairman Balkarin Ch Marak aro dingtang dingtang dilgiparangko ta·raken watpilchina GSMC Pedaldoba regional unit-ba, a·dokni Chief Minister-ko didiataha.
“Saksa mikrake a·songo songdonggipa ong·e aro kamna on·kanggipa ukil ong·e, ia dilgiparangko rim·aniara niamko pe·ani aro a·songni niam bidiko on·gimin bilrangko pe·ani ong·a ine anga nika. Ia dilgiparang, an·tangtangna on·gimin bilo pangchakesa tom·tomao jatni namgnina jingjengataha aro ia dilgiparangko rim·aniara niamni a·palo ong·a,” ine GSMC Pedaldoba regional unit-ni chairman Rimjen Ch Sangma, Chief Minister-na sedoatgipa chittio parakataha.
Ia dilgiparangni jingjengataniara, Garo Hills Autonomous District Council (GHADC) election-o susagipa pilak candidate-rangna Scheduled Tribe (ST) cerficate-ko nangtelgipa ong·atchina dabiani giminsa ong·achim ine janapatengon, ST certificate donggijagipa candidate-rangkode GHADC election-o susana on·na nangja maina GHADC-ko songani miksonganian Tribal jatrangni bilrangko chel·chaknasa ong·a ine GSMC Pedaldoba unit-ni chairman parakataha.
Jatni namgnina jingjengatani giminsa ia jingjengatanio, politician-rang, Nokma-Sordarrang aro dingtang dingtang jolni Tribal jatko dilenggipa manderangba bak ra·tokaha ine janapatskaengon, ia jingjengatanio manderangni bakrimaniko on·anian Tribal-rangna on·gimin bilko warachakna nanganiko mesokani ong·a ine Sangma parakataha.
“Indian Constitution-ni Sixth Schedule ning·o manderang, tom·tome jinma tom·bimongna aro jegalanirangko dakna bil donga. Iandake ia dilgiparangko rim·aniara, niam bidiko on·gimin bilko pe·ani gita ong·a,” ine GSMC Pedaldoba regional unit-ni chairman parakataha.
So·sojengjeng ong·anina dingtang dingtang dolni dilgiparangko rim·anichi tom·tomaniko ra·bana man·gen ia katta ong·ja indiba batesa jatko ding·chaobatatani gita ong·enga ine janapatengon, rim·a man·gipa dilgiparangko maming niam dona gri ta·raken watchina gita GSMC Pedaldoba regional unit, a·dokni Chief Minister-ko didiataha.