So·sojengjeng ong·anio jak donggiparangni kosako niamo pangchake ja·ku de·gen: Home Minister

SHILLONG: Adita salrangna skang Garo Hills-o so·sojengjeng ong·anina jak donggipa manderangni kosako niamo pangchake ja·kurangko de·gen ine Sukrobar salo, a·dokni Deputy Chief Minister aro Home Minister Prestone Tynsong aganenba, rim·a man·gipa manderangko da·o dipet watna man·kujawa ine parakataha.
Rim·a man·gipa manderangko watpilchina dingtang dingtang dolrangni dabienggipani bidingo aganchakaniko on·angengon, ia a·selni bidingo da·o ain gita sandirokanirangko dakkuenga aro ain gita kam ka·aniko darangba champengna man·jawa ine Home Minister parakataha.
“Niamni a·palo kam ka·giparangkode nichanggalna man·ja. Ain gita kam ka·giparangkode kam ka·na on·na nangaia aro chinga darangkoba uamangni ska gita dakna on·na man·jawa,” ine Tynsong, kobor ra·timgiparangna aganaha.
GHADC election-ko ra·doatani ja·man adita jegalanirang dongkuengani gimin sorkari, niam retirangko rakkina nangenga ineba ua aganaha.
“Manderang niamko mande ra·na nanga. Manderang maming saloba niamko jaktango ra·na bil dongja. Iandakgipa kamrangkode sorkari ra·chakna man·jawa,” ine Tynsong aganaha.
Garo Hills, Khasi Hills aro Jaintia Hills-ko man·chape a·dokni darang biapon so·sojengjeng ong·atani kamrangkode sorkari nie dongna man·jawa ineba Deputy Chief Minister parakataha.
Rim·a man·gipa manderangko watpilchina dabie jegalanirangko nikna man·engani gimin janapatengon, “Manderangko maiba a·selni gimin rim·ahaode, sandirokani ja·man charge sheet-rangko ka·gen aro je manderangan rim·ako man·ahachim, uamang kacharirango jaminna mol·molna cholrang donga,” ine Tynsong aganaha.
Garo Hills-ni manderangko tom·tomaniko rakkichina aro sorkari baksa bakrimchina didiatengon, “Pilak kamrangkon aino pangchakesa jako ra·enga,” ine Home Minister parakataha.
GHADC election-ko ra·doatani bidingo talataniko on·angskaengon, Garo Hills-ni manderang, GHADC election-o susagiparangna Scheduled Tribe (ST) certificate-ko nangtelgipa ong·atchina nangnikengani giminsa iako niamona ra·bana sorkari ja·ku de·aha ine Deputy Chief Minister parakataha.