Tura: Meghalaya a·dokni Garo Hills a·jani dingtang dingtang tribal community-rangni kosako niamgri Bangladesh-oni napdrabagiparangchi ka·mikenatanirangko, mande ra·gijaniko aro chonikaniko man·enggipa dake talatenba Nangrimgimin A’chik Dol (NAD) raken jegalataha.
Sonibar salo kobor ra·timgiparangna organisation mamlako aganangaha, indakgipa napdrabagiparang tribal-rangni a·ao donga aro kam ka·e cha·na on·a aro indakgiparangan jat base so·sojengjeng ong·atna jotton ka·enga aro tom·tome dongako golmal ka·na jotton ka·a ine talataha. Mejamangmang a·jao golmal ong·gipa uan a·bachenggipa ong·ja indiba ian biapko tom·tomatjana jotton ka·gipasa ong·a ine NAD matnangataha.
Niamgri songdonggiparangni kosako ja·ku de·jani a·sel indakgipa a·selrangko chagrongenga, ian namgijako dakna didigipa dake ong·enga ine dol authority-rangko matnangataha. Jatni namgnina kam ka·anio bak dongpagipa manderangko aro NGO dilgiparangko niamgri rim·enga aro kal·stapenga, uamangko rim·an kakketgijagipa bichal dake uamang matnange aganangaha.
NGO dilgipa gimikko ta·rake watchina NAD dabianggaha, da·ororo tom·tomgijanio niamgri napdrabagiparangni kosako am·sandianiko dakchina mol·molangaha aro tribal jatrangni a·ao niamgri songdonggiparangko a·rikgalatchina didiangaha. Sixth Scheduled-ni ning·o tribal jatrangni bilrangko chel·chakan baksana niamgri napdrabaenggipana rkgipa niam ritirangko donchina aro sima ario donggipa chel·chakgipa dolrangko bilakdapatchina mol·molangaha.
A·chik manderangni biming aro a·ako chel·chakna on·kanganio aganangaha, a·doko kakket bichalko aro tom·tomaniko rakkina bilakgipa ja·kuko de·china a·dok aro ma·mong sorkari dolgnikon organisation mol·molangaha.
