Jatni namgnina bakrimaniko on·aha ine CM, TMC-ko mittelpila
SHILLONG: Batanggimin sal somoirango Garo Hills-o so·sojengjeng ong·anichi sak manderang sina nangahani gimin aro manderangni gam-jinrang bang·en nosto ka·ako man·na nangahani gimin so·sojengjeng ong·ani ja·pang ja·dilko talbate ma·sie ra·na gita a·dok sorkari, ning·tubate sandirokaniko dakani chol donga ine Budbar salo, a·dokni Chief Minister Conrad K Sangma aganaha.
Iani bidingo kobor ra·timgipa manderang baksa agangrikengon, Garo Hills-o ong·anggipa obostarangara, maini a·sel ong·aha aro sawarang ia so·sojengjeng ong·atanio jak dongmanchaa, iako talbate ma·sie ra·na gita ning·tubate sandirokaniko dakna nangchongmotenga ine Sangma aganaha.
Ia so·sojengjeng ong·ani bidingo mai dakgipa gadango sandirokgen, uko sorkari chanchichenggen ineba Chief Minister, talataniko on·angaha.
GHADC-o taridapgipa ADC-ni niamrangko Governor ra·chakmanahani gimin GHADC-ni election-ko ta·raken ong·atgnokma ine sing·anina aganchakaniko on·angengon, GHADC-ara jakgitelgipa bimangsa ong·ani gimin basako election-ko ong·ato namgen, ukode District Council-ni dilgiparang an·tangtangsa tik ka·gen ine Chief Minister aganaha.
“Chinga iani bidingo GHADC-ni Chief Executive Membor aro gipin dilgiparang baksa agangrikenga,” ine Sangma aganaha.
Garo Hills-o so·sojengjeng ong·anina dingtang dingtang dolrangni dilgiparangko rim·ani bidingo sing·skaon, iani giminde Chief Minister, mamingkoba aganna gita jechakaha indiba police-rangsa, niam aro sakkio pangchake ja·kurangko de·enga ine aganaha.
GHADC-o tarigipa niamna chakpaanirangko on·ahani gimin aro gital Executive Committee baksa bakrimaniko on·ahani gimin a·dokni Chief Minister aro NPP-ni national president, Trinamool Congress (TMC)-ni MDC-rangkoba mittelpilangaha.
“Dingtang political party ong·genchimoba ia kamo an·tangtangni party-ko chanchigija TMC-ni dilgiparang, MDC-rang aro mitam Independent MDC-rangba jatni namgnina ja·ku de·anio bakrimaniko on·aha aro iana chinga namen kusi ong·a,” ine Sangma aganaha.
KHADC aro JHADC-oba apsan daken Tribal ong·gijagipa manderangni bak ra·aniko champengna niamrangko taridapgenma ine sing·aninade ua mamingkoba aganna gita jechakskaaha.
