TURA: Garo Hills Autonomous District Council (GHADC) election-o susagiparangna Scheduled Tribe (ST) certificate-ko nangtelgipa ong·atna da·o niamko ra·gatna man·aniara A·chik jat gimiknan mikkim rasongni ong·aha ine Garo Hills-ni Nangrimgimin A·chik Dol (NAD) parakataha.
NAD-ni parakatani gitade, GHADC election-rango gipin jatrangni, mongsongbate Tribal ong·gijagipa manderangni bak ra·aniko ru·uta bilsirangonin dingtang dingtang A·chik dolrang aro A·chik jat dabiengachim aro da·alo ia dabianiko chu·sokgipa ong·atna man·aniara A·chik jatna gisik ra·beani somoi aro mikkim rasongniba ong·aha.
Ia kamko chu·sokgipa ong·atna man·ahani gimin NAD, dingtangmancha Nokgipa Isol, A·chik manderang, NGO-rang, Nokmarang, Sordarrang, songni nokni manderang, mondolini dilgiparang, sorkari official-rang, political dilgiparang, Khasi-Jaintia jong-ada no-abirang, a·dokni Chief Minister aro a·dokni Governor-koba mittelpilataha.
“A·chik a·songo songdongenggipa mande sakanti aro dingtang dingtang dolrangni ku·cholsan ong·e kamko ka·ani a·selsa da·alo A·chik jat chena man·aha. Ian A·chikrangni bil, miksongani aro bakrimaniko mesokaniba ong·a. Ia kamko chu·sokatanio jak on·gipa mande sakantikon chinga changsatai mittelna ska,” ine NAD-ni general secretary LK Sangma parakataha.
