TURA: Batanggimin sal somoirang so·sojengjeng ong·anirangko nikna man·angahani gimin West Garo Hills a·jani District Magistrate, Bharat Nagarik Suraksha Sanhita (BNSS)-ni Section 163-ni ning·o, walantian attam 8:00 bajioni pring 6:00 bajiona walni curfew-ko ra·gatangkuaha.
West Garo Hills a·jani pilak biaprangon attam 8:00 bajioni pring 6:00 bajiona curfew ong·angkugen ine u·iatengon, curfew-ni somoirango noktangtangoni ong·katjachina gita District Magistrate mikrakataniko on·angaha.
Curfew-ko darangba pe·jachina gita West Garo Hills a·jani ning·o an·tangtangna on·gimin bilrangko jakkale, nirokchina gitaba District Magistrate, niam reti rakkigipa bimangrang, executive magistrate-rang aro police officer-rangna ge·etaniko on·ataha.
Ia niamko pe·genchimode ba manijagenchimode, Bharatiya Sanhita Nyaya (BNS)-ni Section 223-ni ning·o rakgipa ja·kurangko de·na draatako man·gen ineba District Magistrate, mikrakataniko on·angaha.
