GHADC-na dingtang electoral roll-ko tarina a·bachengchina TGSCF didia

TURA: Garo Hills Autonomous District Council (GHADC) election-o Tribal ong·gijagipa manderangni susapaaniko champengna gita da·o niamko a·dokni Governor ra·chakmanahani gimin GHADC election-o Garo Hills-ni Tribal jatrangsan dilgiparangko seokanio bak ra·na man·na gita dingtang electoral roll-ko tarina kamrangko ta·raken a·bachengatchina Tura Garo Senior Citizens Forum (TGSCF), GHADC-ni Chief Executive Membor (CEM) Dhormonath Ch Sangma-ko didiataha.
Iani bidingo GHADC-ni CEM-na sedoatengon, salgro salaramni Assam, Meghalaya, Tripura aro Mizoram a·dokrango songdongenggipa Tribal manderangni bil, a·a-chia aro dingtangmanchagipa jatni daka rikaniko chel·chaknasa Indian Constitution-ni Sixth Schedule-ko tariaha aro ian Autonomous District Council (ADC)-ni ning·o Tribal-rangna jakgitelaniko on·gipa ong·a ine TGSCF-ni general secretary LC Momin parakataha.
“Meghalaya a·doko donggipa damgittam ADC-rangoni GHADC-ba damsa ong·paa aro Indian Constitution-ni Article 244(2) aro 275(1)-ni ning·o, ia Tribal jolrango an·tangtangni u·i-ma·sia gita namroro silroroaniko ra·bana aro jatni daka rikanirangko rakkina dingtangmancha bilko on·a,” ine TGSCF parakataha.
Batanggimin sal somoirango Garo Hills-o ong·anggimin obostarangni bidingo suk ong·gijaniko parakatengon, GHADC-ni salgnina special session-ko ong·atanio, GHADC election-o susana gita ST certificate-ko nangtelgipa ong·atna dingtangmancha taridapgimin niamko membor-rang jinma ra·chake pass ka·aha aro ian GHADC election-o Tribal ong·gijagipa manderangni bak ra·aniko champengna skanggipa ja·ku de·chakatani ong·aha ine TGSCF parakataha.
Indake ong·engon, GHADC election-o Tribal ong·gijagipa manderang susaaniosan ong·aigija dilgiparangko seokanioba bak ra·pana man·jana gita dingtang electoral roll-ko tarina kamrangko ka·chakatna nangengaha ineba TGSCF, GHADC-ni CEM-ko didiataha.
“GHADC election-o Tribal manderangsan pu·onna aro susana bilko man·anichi ian Garo Hills-o songdongenggipa Tribal manderangni nanganiko chu·sokatan baksana Constitution-ni Sixth Schedule-ko tariani miksonganiko chu·sokatna dakchakaniba ong·gen,” ine TGSCF-ni general secretary, GHADC-ni CEM-na sedoatgipa chittio parakataha.