Election-ko ong·atani bidingo GHADC-ni dilgiparang baksa agangrikchenggen: CM

SHILLONG: Garo Hills Autonomous District Council (GHADC) election-ko ong·atani bidingo District Council-ni dilgiparang baksa agangrikchengani ja·mansa a·dok sorkari, sal somoirangko tik ka·na man·gen ine Budbar salo, a·dokni Chief Minister Conrad K Sangma parakataha.
GHADC election-o susaenggipa candidate-rang Scheduled Tribe (ST) certificate donggiparang ong·na nanggen ine GHADC-ni taridapgipa AD Rule-rangko a·dokni Governor Ch Vijayashankar, ra·chakangani ja·man, District Council-ni dilgiparang baksa agangrikchengani ja·mansa GHADC election-ko ong·atna tarikko tik ka·na man·gen ine Chief Minister parakataha.
Iani bidingo kobor ra·timgipa manderang baksa agangrikengon, “Chinga iani bidingo obostarangko nichengna nanggen maina ia kamde a·dok sorkarini kam ong·ja. Iako anga talatna sikenga anga saksa Chief Minister ong·e, District Council-rangna chinga pangnan dakchakanirangko aro agan-ku·pattianirangko on·na man·aia indiba kamrangko ka·anide District Council-ni jakosa ong·a,” ine Sangma aganaha.
District Council-rangara an·tangari jakgitele chalaigipa bimangrangsa ong·a ine talataniko on·angengon, “District Council-de jakgitelgipa bimangsa ong·ani gimin council-ko chalaienggipa manderangni nangnikanirangko chinga nichengna nangaia. Chinga district council-ni dilgiparang baksa agangrikenga aro da·o GHADC-o gital CEM aro EC-koba songahani gimin uamang baksa chanchirimanio pangchakesa sorkari, ja·kurangko de·gen,” ine Chief Minister aganaha.
GHADC election-o Tribal ong·gijagipa manderangni bak ra·aniko champengna dabianio, Garo Hills-o so·sojengjeng ong·angani ja·man April-ni 10 tariko ong·atna tik ka·gimin GHADC election-ko a·dok sorkari dontongatahachim aro ja·mano GHADC-ni term-ko April 18 tarikoni a·bacheng jadokna ra·dodapatahachim.
GHADC-o gital CEM aro EC-ko songani ja·man, Tribal ong·gijagipa manderang bak ra·pana man·jana gita AD Rules-ko taridapenba GHADC-o pass ka·aha aro ia niamko Mongolbar salo a·dokni Governor ra·chakangaha.