WILLIAMNAGAR: Bristibar salo, Krishi Vigyan Kendra (KVK) East Garo Hills, Tura College of Community Science (CCS)-ni dilanichi, East Garo Hills a·jani District Horticulture Office baksa nangrime, ‘Promoting Scientific Citriculture ine Garo Hills’-ni bidingo State Level Workshop-ko Williamnagar-ni DC Office Multipurpose Hall-o ong·atangaha.
Ia workshop-ko Fruit Development Scheme-ni ning·o ong·ataha aro ia workshop-ko ong·atna ICAR-CCRI, Nagpur, Maharashtra dakchake on·aha.
Ia workshop-ko ong·atanio, Tura CCS-ni Dean Dr Jyoti V Vastrad, mongsonggipa sokgipa ong·e bak ra·angaha aro ia program-o Samanda Block-ni BDO Tochri Sangma-ba saksa sokgipa ong·e bak ra·angaha.
Tom·ani a·bachengao KVK-EGH-ni Senior Scientist aro Head Dr Shah, rimchaksoani kattarangko aganangengon, game ge·e cha·giparangni kamrango meseng bolam biterangni gamchatgipa ong·ani gimin agan-talatanirangko on·angaha.
Ia tom·anio Tura CCS-ni Dean Dr Vastrad-ba jinmana aganprakengon, meseng biterangoniko dingtang dingtang cha·ani bosturangko tarina man·ani gimin aro maikai meseng biterangara, mandena namgniko ra·bana man·a, uarangni giminba agan-talatanirangko on·angaha.
Ia workshop-ko ong·atanio, Ampangdamgre, Ampanggre, Mandalgre, Bolkinggre, Gonggre, Daribokgre, Samgongre, Balmoram Dochokgre, Durama Ampanggre, Rongchek, Bare Daruge aro uandakgipa songrangoni sak 103 game ge·e cha·giparang skie ra·angaha.
